嘉玲搵偉仔傍實輕鬆爭影后
劉嘉玲近日不時性感出擊，不過前晚出席Valentino在中環舉行的2011秋冬時裝騷時卻收起性感，以一襲典雅的紅色晚裝示人，而佘詩曼、陳嘉容、楊紫瓊與前夫女兒潘楚穎亦盛裝到場。提到《金像獎頒獎禮》舉行在即，憑飾演武則天角逐最佳女主角的嘉玲，心情輕鬆，會以參加派對的心情出席頒獎禮，並坦言仍未挑選戰衣。問到心情如何？她說：「之前朋友就好肉緊！（老公梁朝偉呢？）佢就冇！但我喺佢心目中係最好！（到時會唔會爭取同偉仔孖住出席增加信心？）冇分別！不過有佢在場影相靚啲。」
老公新戲打鑼搵女
對於近日有傳從影以來最想演的角色是東方不敗，嘉玲說：「冇特定角色，只要角色感動就夠，醜樣都OK！」她又表示未知會否接拍《讓子彈飛》續集：「不過同佢哋合作好開心，有第二集嘅話就要傾吓花紅！」
此外，偉仔近日落實接拍麥兆輝開拍的電影《聽風者》，不過導演麥兆輝表示電影將在上海取景，暫時未有女角人選：「要配偉仔，一定要係一線女演員。」
嘉玲在典雅長裙中露出白滑長腿，十分誘人！
偉仔將赴上海拍攝新片《聽風者》。
演技備受肯定的嘉玲，以輕鬆心情角逐影后。
不用行騷的陳嘉容，拍照時依然擺出行騷甫士。
佘詩曼一身造型，凸顯高貴。
楊紫瓊（左）與前夫女兒潘楚穎難得敍舊，當然開心！