為人幽默易嗒女
小弟曾幾何時都好羨慕啲靚仔，皆因好多女都會向佢哋投懷送抱。不過，自從跟師兄落夜店蒲之後，我就唔再羨慕靚仔，事關師兄其貌不揚，身形比我仲肥，但係佢好受啲女歡迎，個個都鍾意黐住佢，師兄仲話去內地夜場玩樂嘅時候，曾經食過免費餐添！而師兄之所以咁有吸引力，皆因佢口甜舌滑，充滿幽默感，氹到啲女個個鬼咁開心。
而外國網站進行一項調查，結果亦證明男人有幽默感，成功溝到女嘅機會甚高。該調查搵嚟超過1,000名男女進行訪問，問佢哋會考慮咩因素至會同對方拍拖，結果受訪者當中有6.8%考慮經濟因素、7.3%會考慮教育程度、10%考慮外表、30%考慮是否有相似文化背景，而最多嘅45%則考慮對方有冇幽默感。咁又講得冇錯，拍拖都係想開心啫，如果男方成碌葛咁，冇啲風趣幽默，真係令女伴好無癮，悶到抽筋。另一邊廂，男士都要求女方有幽默感，所以女士們唔好成日扮高貴、扮矜持，有時都應該搞吓笑！