面大鼻細忠僕命
好多侍奉大富人家嘅工人，都對主人忠心耿耿，做到幾十歲都唔肯退休，佢哋嘅面相大多數都係面大鼻細。相書話，男士如果面大鼻細，就係忠僕相，一生人不為自己打算，只懂為主人分憂，替主人辦事時好有條理，盡力盡心。
如果佢哋開公司自己做老闆，成績往往會差強人意，做嘢毫不起勁，甚至失敗收場。因為佢哋份人欠缺主見，要佢哋做決策，一定議而不決，打工就唔同，老闆做決定，由佢哋執行，往往會雷厲風行，感情上亦一樣，往往處於被動，唔識得表達情感。
所以做佢哋嘅另一半，就要主動一啲，除咗感情表白上要主動，佢嘅其他大小事務，你都要主動處理。事關佢哋只會做老闆吩咐嘅事，其他瑣碎家事佢哋都唔會上心，只好靠太太從旁處理，而唯一優點就係真誠專一，唔會隨便變心。