替死鬼
肥牛、肥寶同肥明三個都係冒險家，早前相約一齊去原始森林探險。三人去到森林嘅時候，就搵咗個地方紮營休息，點知一起身就發現自己畀人五花大綁，仲送到一個食人族部落嘅酋長面前。酋長就話：「你哋好彩，照傳統今日我哋要食齋，不過你哋入侵我嘅領土，每人都要打一百棍！但係，你哋可以要求用現場任何一樣嘢墊住，算係仁至義盡啦！」肥牛率先畀人捉出去打，佢就要求用一個藤製坐墊，用嚟墊住個屁股。之但係，族人棍棍都大力打落去，兩下就將坐墊打爛，最後肥牛被打到屁股開花。
到肥寶嘅時候，肥寶就見到一個鐵鑊，於是就要求用鐵鑊頂住，果然令屁股得以絲毫無損，佢仲好得戚咁同肥明講：「最硬淨嗰樣都畀我用咗，睇嚟你注定要屁股開花喇！呵呵……」當肥明將要被打嘅時候，肥明指住肥寶話：「麻煩將佢墊喺我屁股上面，仲要正面朝天！」最後，肥寶嘅慘叫聲傳遍整個森林……