SUN世代：武夫打過界建眼鏡王國

人生如戲，但在有限的劇本上，人總能改寫結局。鄭德龍本來是位武術人，一次練武意外，令他差點失去性命，被迫放棄追求心中所愛。死裏逃生的情節控制不了，他沒怨天，也不氣餒，反而更努力去發展另一事業，終於建立自家的眼鏡王國，成為多個品牌的眼鏡生產及驗證機器代理商。只因堅持，他的結局從此不再一樣。

「嗰時只得二十幾歲，係人生一個好大打擊！」當日，鄭德龍跟一班師兄弟在練武，突然「砰」一聲，他隨即倒在地上，後腦着地，要立即送院。醫生說，他頭骨骨裂，可能要開腦做手術。最後，他卧床兩個月後出院，不用開腦，但從此要離開武術界，「好似對腳明明喺度，但就話唔畀你行路咁痛苦。」

他的武術路，要由童年說起。他是家中獨子，十歲隨父母移居加拿大，十一歲開始學武。「有日，我喺學校被人打，返到屋企畀阿爸知道，就要我去學功夫。雖然係為咗傍身，但父母唔想我用嚟搞事，所以揀咗學太極。」其實他自小是李小龍、成龍粉絲，最愛看功夫電影，早已對中國武術產生濃厚興趣。

每年暑假，他都跟家人返港，順便學武。十六歲那年，他接觸到刀槍劍棍的表演武術，學了兩個月後，便返加拿大參加泛美武術大賽。首次走上擂台，便獲得棍術比賽冠軍。之後他繼續參加當地各項武術比賽，更曾成為加拿大國家級武術代表。

但一次意外，近乎摧毀了他的少年夢。「受傷嗰一刻，梗係有執着過，但後嚟又諗，學武術學到嗰個年紀，做到嗰個地步，已經無憾，或者係機會試吓其他嘢。」讀資訊科技出身的他，決定返港發展，與友人一同開設公司，由武術界走進科技界。

有次，一位眼鏡公司的客人問：「我有部美國嚟嘅眼鏡儀器搞唔掂，你過嚟幫我睇睇！」但沒想到，幫客人竟為他帶來另一機遇。「我哋先聯絡嗰邊廠商，再幫個客搞掂部機，個廠商覺得好意外，後嚟仲問我哋有無興趣做佢哋代理。」

成為眼鏡儀器本港的獨家代理後，為擴大客源，他主動聯絡有出產眼鏡配件的歐美品牌，「佢哋嘅工廠大部分都喺內地，只要品牌想用我哋代理嘅機，就會要求啲廠商用。」他代理的眼鏡生產及驗證機器，每部至少數十萬港元計，而在短短一年間，已賣出四十部，成績有目共睹。

除了做代理，去年他開發第二個業務，為本港引入外國多款功能類型的眼鏡品牌，「依家一講到眼鏡，都係同潮流時裝有關，而我哋就以功能為噱頭，好似運動、護眼眼鏡，嚟緊希望可以推廣到上班一族。」

塞翁失馬，焉知非福。從昔日武術人到今天的生意人，縱然路不易走，但鄭德龍仍心存感激，「學武術教識咗我好多嘢，做生意會成日面對好多競爭對手，就好似喺擂台上同時被多個人圍攻，一定唔可以心急，要逐一擊破先會成功。」

鄭德龍小檔案

現 職：新聯光學科技有限公司業務拓展經理

學 歷：加拿大多倫多約克大學市場學學士、美國柏克萊加州大學電子商貿研究生

興 趣：遊車河、攝影