CULTURE o翕：參政可人兒

這次我們找來走上從政之路的80後Iris，分享參政原因。

80後女性站起來，誓將撐起香港政治未來半邊天！愈來愈多80後高學歷女性，抱着服務社會的心，積極參與地區工作，部分更已走上政治舞台，展開從政之路。城市大學應用社會科學系副教授陳國康指出，新一代女性參與政治，能為過往由男性主導的香港政治體制，帶進更多女性聲音。

Iris：年少時，我無諗過參與政治或者地區工作，亦對呢方面唔太關心。到大學畢業前，見一份民政事務處社區幹事嘅工作時，畀人問：「選舉係咩？」「你住嗰區嘅區議員係邊個？」我完全唔識答。嗰刻我先發現對身處社會唔熟悉，開始想去了解。跟住香港發生高鐵、政改等事件，更令我覺得，應該企出嚟為社會做啲事。

陳：近年出現好多有心從政嘅80後女性，主因有兩個。首先，香港教育制度完善，不論男女，接受高等教育嘅機會都較以往多。女性接受教育機會提高，不但令佢哋社會地位提升，亦令佢哋嘅角色，由以往集中喺家庭改而步向職場，到依家踏足政治。另外，香港政黨化日趨成熟，各政黨都希望吸納新血，令年輕人有更多機會參與政治。

Iris：機緣巧合，找到一份區議員助理工作，兩年後轉做立法會議員助理，接觸層面更廣闊，令我對社會了解更多。雖然去年參選區議員落敗，但我仍堅持繼續為社區服務，因為呢份工作帶畀我好大滿足感。我最近幫咗一對夫婦處理家庭糾紛，該名妻子愁眉苦臉，雖然我未必真係幫到佢哋，但第二日見到該名妻子，見佢有番笑容，已令我好開心、好滿足。

陳：其實香港有好多有心、有能力從政嘅新一代女性，投身參與政治，對佢哋有絕對嘅益處。而且女性比男性更加細心，喺做地區工作嘅時候，可以畀到居民更貼心嘅服務，呢啲係佢哋嘅優勢。

Iris：回想當初從政，有如「初生之犢不畏虎」，雖然年輕人缺乏社會經驗，但正因為年輕，經濟負擔較少，可以全情投入社區工作。我相信，年輕人有新思維，能夠為社會帶來不少新啟發和改變。

陳：從社會角度出發，更多女性從政其實有莫大益處，例如喺處理有關女性嘅社會議題時，女性聲音會更大，意見亦都會更好被反映，平衡男女兩性利益。其實，現時本港嘅政治仍然由男性主導，但愈來愈多年輕女性參政，證明喺政治舞台上，女性絕對有能力做到男性做到嘅嘢。