謝安琪萬人前 聲討環球

謝安琪（Kay）跟所屬的環球唱片幾乎已是「有你冇我」的局面，但如此局面焉能玩謝謝安琪！前晚借紅館騷變成聲討環球大會，於萬人前宣洩憤怒！再次「偉論Kay」上身的她講到明自己打不死，隱喻明示出齊，三擊寸爆環球，連多謝捧紅她的「娘家」也嫌費事！

環球唱片與謝安琪的賓主關係似乎已到尾聲，本報日前率先披露Kay將掟三百萬走人，矢志跟公司割席，一切會於個唱後有所決定。而既然已「洗濕個頭」，似沒轉圜餘地，Kay索性在兩晚個唱、合共逾萬名觀眾前狂插環球！前晚頭場演出，她暗指受迫害，拋下一大堆偉論，句句有骨落地！

一連兩晚《謝安琪2012你們的幸福演唱會》前晚開騷，縱使只開三面台，入座率只得八成，但未有影響Kay情緒，還化身「偉論Kay」以隱喻借力打力三插環球！最頂癮第一擊，擺明寧願請隔籬唱片公司的24味及RubberBand做嘉賓，也不願同公司歌手上台，連在鳴謝環節時，Kay多謝天下人，偏偏不肯慷慨多謝環球唱片一聲，認真冇面畀。

演唱會前半段，Kay尚算以歌會友，下半Part卻開始嚟料！當她戴上假髮以一身麥當娜造型演出時，看到老公張繼聰企在台邊打氣，即唱出方大同為她寫的《脆弱》，繼而暗插環球，她自比海龜要跟公司鬥長命：「我好強橫，係野草捽唔死，係海水污染入面嘅海龜，好長命，生命力強，不過估唔到自己喺朋友眼中係咁脆弱！」「偉論Kay」豪言壯語愈講愈多，一時說能上紅館舞台是莫大幸福，一時又講教仔經，還播出多張一家三口合照Sell溫馨，其中老公與囝囝張瞻的出浴照，睇到Fans嘩嘩聲。

自誇打不死

至Encore，Kay力撐與環球高層Duncan擘面的經理人夏森美，強調所屬團隊永遠打不死，更擺明以小寸大：「近排夏森美受到好多攻擊，不過佢仲好肥，應該冇事，我哋公司（經理人公司）細細哋，只係家庭式作業，都可以上到紅館已經好好！」她又一時感觸落淚：「雖然出面風大浪大，但如果落雨就當洗面，大浪就當沖涼，等大風吹乾，我哋會用打不死精神做音樂！」

Kay全晚共唱33首歌，雖然尾段的感言每次都花上逾分鐘，幸造型夠多，短裙下又腿影橫飛，總算值回票價！

句句有骨 痛擊環球

冇面畀

Kay明剃環球眼眉，開騷連多謝捧紅自己的公司也懶得施捨，還請外援助陣，擺明冇面畀。

鬥長命

Kay自比海龜及野草，以「地球」海水受污染暗喻「環球」，嘲公司已受污染，但自己生命力強，天生長命格咁話！

小得起

力撐經理人夏森美跟環球力戰到底，自言雖然經理人公司規模小，但即使風高浪急，依然打不死！