政情：搞搞政：Miss葉劉教D姐中英文

經常大搞正字工程嘅新民黨主席葉劉淑儀尋日又再老師上身，連番糾正舊同事公務員事務局局長「D姐」俞宗怡嘅中英發音同用字。

話說立法會尋日討論公務員薪酬調整，D姐全場將調（音：掉）查讀成調（音：條）查，講咗差唔多成個鐘，葉劉終於忍唔住開口話：「局長唔好介意我多口咬文嚼字，係調（音：掉）查，唔係調（音：條），聽落有啲刺耳，國語都唔同發音啦！」D姐嚟唔切畀反應，惟有係咁意話多謝主席，但之後繼續讀成調（音：條）查。

之後討論公務員種族概況，傾到咁上下葉劉又插口話：「唔好意思又咬文嚼字！」接住話政府叫混血兒做「mixed」過時兼難聽，應該叫「multiracial」，政治正確啲白人應該叫「caucasian」，至於黑人喺美國就叫「african american」，唔係叫「eurasian」，事關唔一定係歐亞混血兒嘛。

畀葉劉寸完又寸，呢次D姐終於反擊，話呢啲稱呼係跟番統計處做調查時嘅叫法，葉劉再一句壓落去話：「咁統計處都要改啦！」D姐再次無語，惟有謝過葉劉嘅意見算數。