政情：陳禹昌讚中醫博大精深
中銀保誠行政總裁Thomas陳禹昌好耐冇同傳媒見面，原來佢舊年年尾患咗氣管敏感，所以少咗出嚟應酬。佢尋日話初初見有啲喉嚨痛，於是去睇西醫，醫生開咗啲抗生素畀佢，但愈食愈嚴重，睇專科都冇改善，之後就轉睇中醫，只係食咗一次藥就好番晒，所以好佩服中醫嘅博大精深。後來佢驗出根本唔關細菌事，只係敏感，所以食抗生素冇效，仲搞到身體弱咗。
依家Thomas已經好番晒，可以繼續全力搏殺。佢亦保持定期跑步，更周不時去行山，上禮拜至喺新界行咗四個幾鐘。近排天氣咁熱，佢教記者除飲多啲水外，仲可以帶少量鹽，以迅速補充電解質。
