政情：彭博搭港鐵周總大陣仗

香港尋日有個高層次環保會議舉行，成員之一、C40城市氣候變化領導小組主席兼美國紐約市市長彭博更趁機會參觀本港嘅鐵路服務，試搭港鐵後，佢盛讚港鐵運作效率高，車廂仲好清潔，或者佢睇慣咗紐約嘅地鐵啩！

彭博尋日出席完會議之後，特登走去試搭港鐵嘅列車，港鐵當然不敢怠慢，由行政總裁周松崗同副車務總監金澤培親自招呼。一行人喺灣仔上車，一直搭到去中環，之後慢慢行過去香港站，再搭一程車去到青衣。唔講唔知，彭博雖然係富豪，但佢平日返工卻好平民化，經常搭地鐵返工。

呢個美國大型資訊平台「彭博社」嘅創辦人尋日喺香港站見到大電視播放緊「彭博社」嘅節目時，笑到見牙唔見眼，仲即場要求影番張相留念添。

彭博（前右）喺周松崗（前左）陪同下搭港鐵，大讚香港地鐵好乾淨。港鐵提供照片