政情：廿蚊張踩過界撈柴油筍工

最低工資快將出台，今年三月因為「廿蚊論」名噪一時嘅飲食界立法會議員張宇人近排未見大動作，唔知係咪同佢已經轉工有關，因為今年八月二十三日，廿蚊張向立法會提交嘅個人利益申報紀錄中，「受薪工作及職位等」一欄改為「ASB Biodiesel（Hong Kong）Ltd顧問」，中文名為「奧地利環保公司」，但佢提供啲乜嘢顧問意見就冇詳細講。

廿蚊張過去有個新地旗下銅鑼灣世界貿易中心會副總經理嘅名銜，但世貿會曾講過，廿蚊張實質上係擔任策略顧問工作。據講呢份工超筍，月薪高達二十萬元添。咁廿蚊張嘅新職又做乜呢？呢間奧地利環保公司嘅業務性質，但同飲食業都有一定關係，因為呢間生物柴油廠係將廢棄食油循環再造提煉為車用柴油，相信要向食肆大量收集廢棄食油，估計廿蚊張可以喺聯繫食肆方面擔當重要角色。我哋尋日聯絡過廿蚊張，但佢無回覆。

轉做生物柴油後，廿蚊張嘅飲食界議席亦唔受影響，事關富貴黨主席劉健儀做律師，但代表航運及交通界，謝偉俊本身都係律師，結果當選為旅遊界議員。所以廿蚊張轉工後最大嘅變化可能係佢對業界嘅立場有冇改變就真。