政情：搞搞政：邱騰華做騷變氣候逃犯

港府推行高官問責制已經八年，但好多官員對自己嘅定位同角色似乎仲係矇查查，近排推親重要政策都衰收尾嘅環境局局長尋日公開呻自己好忙，仲話依家每日最少出席四個活動，最多嗰時甚至出席六個活動，揀選活動時一定要取捨。咁講本來冇唔妥，但係遇着立法會有重要會議時，邱騰華好多時都隱身，搵下屬去頂；反而呢啲社交活動就又要嗌又要去，唔通官員只求做騷爆燈，懶理問責與否？

邱騰華尋日出席「地球再生　綠日在方舟」活動時話，自己時間緊迫，但好多活動都邀請佢出席，好多時都要選擇，諗過度過至得。佢仲舉例，話尋日遇到C40氣候變化國際會議喺香港舉行，佢一度心情好矛盾，不過，考慮到信仰因素，佢最終選擇出席喺馬灣公園挪亞方舟舉行嘅環保活動。

本港嘅環境局局長冇選擇C40會議，反而入咗馬灣抱小朋友影大合照，呢個決定恐怕會惹來爭議。何況佢成日被人批評缺席立法會，郁吓就搵下屬政務官出席，唔符合問責制度嘅安排。睇嚟啲高官應該檢討吓係咪做騷過度？