政情：王桂壎煮雪蝦膺廚神

城中興煮食，法律界尋日仲舉辦咗個出得法庭、入得廚房嘅「律師廚神大賽」，參賽隊有九隊，平時斯斯文文嘅律師換上廚師裝一樣咁似模似樣，比賽仲加插一個會長盃，由五個專業團體嘅代表組隊參加，律師會會長王桂壎夫妻檔上陣，竟然以次級材料贏得比賽，真係名副其實嘅廚神。

會長盃嘅賽制幾特別，五隊人比賽前一刻先知道用咩材料，王桂壎夫妻唔好彩抽中雪藏虎蝦，以前喺英國讀書嘅王桂壎透露佢經常煮嘢食，一見到係雪藏蝦，即刻知道要煮到好濃味先掂，於是用咗蒜頭、薑、葱、指天椒同胡椒粉去調味，先用生油煎到八成熟，之後再用牛油煎埋餘下兩成，等啲蝦乾晒身先可以上碟。之後再加大量清酒，冚過雪藏味。

結果係點？王桂壎奪冠囉，評判之一嘅行政會議非官守議員召集人梁振英都話冇得頂，食過翻尋味呀！至於律師廚神大賽，中聯辦法律部整咗道魚柳做嘅菜式命名為「一鍋兩制」，試食嘅評判聽到個個都會心微笑，最後得到總季軍！