阿加尼亞灣 深入靛藍色潛寶

由香港飛到關島,大部分航班都係清晨三、四點到達,冇得喺飛機上率先一睹島上風光。不過只要入住杜夢灣(Tumon)酒店區,瞓醒一覺推開大窗,除了陣陣微風吹送,仲會見到碧綠海水成環形擁抱整個島嶼。就似是上天送給關島的禮物包,與遠方靛藍色深不見底的汪洋大海形成強烈對比。想知包包內有何寶物?當然要跳入水親身發現啦!

美景當前 無牌照潛

關島於幾百萬年前,由兩座火山沉入海底連結而成,如今火山已啞火多時,變成今日長滿椰子及杧果等熱帶植物嘅島嶼,而海島周邊就被珊瑚礁環繞,大部分水深只有數十米,令水面呈現剔透的碧綠色;在這片漂亮的綠色禮物包內,藏有超過300種珊瑚及900種珊瑚礁魚,係全美國最大面積及最多種類嘅珊瑚區,成為潛水、賞魚熱點。如果閣下同小記一樣,於公司潛水就出神入化,但出海就好少機會的話,唔使擔心,可以參加當地Shotguns潛水公司提供的無持牌水肺潛水體驗團,備有接送服務之餘,團隊仲有中、英、日及韓四種語言講解,迎合亞洲遊客需要,收費只需US$85(約HK$659),諗落真係幾抵玩。

位於阿加尼亞灣的Fisheye保護區,面向菲律賓海,風浪比較平靜,魚量亦較多,是關島浮潛、水底漫步及水肺潛游勝地。到埗填好問卷,導師就幫大家着上潛水衣物,以及起碼四、五公斤重的水肺,不過導師話落咗水就會變輕,而且離海邊只有兩、三分鐘腳程,一眾身嬌肉貴的香港人都頂得住。導師似乎睇得出大家初次潛水有點緊張,原本不苟言笑的面孔即時變臉,好生鬼咁指導大家落水後點樣應對,以及如何修正錯誤,令身邊連游泳都未識的參加者都輕鬆起來,之後大家穿齊蛙鞋,開始練習耳壓平衡、手勢及呼吸,那便完成約15至20分鐘的水肺應用速成班,可以正式開始下海禮。

搶住睇 腸住食

不過新手終歸新手,為安全起見,每位教練只會帶四名學員,潛泳時會放出一條麻繩,大家相隔2m左右握住條繩,慢慢喺水中游逛,呢個時候切記將剛才嘅輕鬆心情盡量放大,放慢呼吸及動作,否則就會捲起海床嘅沙石,破壞環境及嚇走魚兒。

過咗一陣,身體不知不覺已經習慣水中環境,於是來到水深2m的區域,魚量明顯較多,球形及扇形的各式珊瑚都現身。導師一邊帶大家Group埋合照拍攝,一邊派發約手掌長的熱狗腸,利用拇指迅速將腸肉逐片彈出,說時遲那時快,不知幾時身後突然多了幾百條又黃又藍的五彩魚蜂擁搶食,當堂手指縮一縮,驚死縮慢點連手指都畀佢哋食埋;好彩嘅話,仲會遇到十幾米高、長不見尾嘅海底船礁,以及無數於周邊棲身的珊瑚魚,十足海底歷險,好玩、新奇之餘,亦深深感受到海洋蘊藏嘅生命力有幾大。

Shotguns

收費:US$85(約HK$659,包接送)

電話:(671)647 9090

網址:www.shotgunsguam.com

合家歡水上樂園

唔想去到海邊咁遠,又或者扶老攜幼唔方便,又想欣賞海底世界?仲有辦法,就係去參觀Pacific Islands Club酒店內全關島最大嘅水上樂園。當地有多個戲水池,上面有獨木橋、扯大纜及射籃球等玩意,加上水深最多只有1m,一家大細可以放心玩。戲水池以外,樂園旁邊仲有一個珊瑚魚池,既有凹凸不平的礁石,又養了多款七彩繽紛的珊瑚魚,可供遊人浮潛欣賞。不過為保持水質乾淨,必須即日早上預約時間,而且往往爆滿收場,想睇就要早啲到!

黃昏BBQ夠詩意

玩到餓餓哋,水上樂園旁邊仲有個面向海邊嘅BBQ場地,開放時間剛好在黃昏時段,讓大家一邊用餐一邊欣賞日落,感覺寫意,而且BBQ的水準甚高,可以無限添食之餘,用料又上乘,有香港人最鍾意的大生蠔、手掌長海蝦、濃味牛仔骨,以及啖啖肉的五花腩,聽到都流晒口水,加埋啤酒小酌,談笑間美食美景一次過擁有,為整日旅程畫上完美句號。

Pacific Islands Club BBQ

開放時間:6:00pm-9:00pm

收費:US$68(約HK$527)

電話:(1-671)646 9171

網址:www.picresorts.com

Info

簽證:持BNO或特區護照毋須簽證

機票:由香港直飛關島,來回經濟客位機票約HK$5,090起。

貨幣:US$1兌換HK$7.75

天氣:11月天氣25至31℃

Boris

船礁大到見首不見尾,梗係要合照留念啦!

拉實教練放出的繩潛游,安安全全咁細賞水中世界。

為求安全,切勿心急,先喺淺水區熟習水肺應用。

冇帶潛水相機?冇問題,因為教練隨行會為大家拍照留念。

教練講解手法幽默、風趣,大家自然聽得分外專心。

潛潛吓發覺耳鳴?記得㩒實個鼻做「反壓」動作。

教練派發嘅熱狗腸果然「味」力十足,好快就引嚟大群珊瑚魚。

漫天珊瑚魚又黃又藍游來游去,同遊客進行親密接觸。

由酒店Lobby向外望,就會見到PIC酒店全島最大嘅水上樂園。

水池面積相當大,而且水深大約只有1m,最啱一家大細齊齊玩。

唔只游水,仲可以喺水道上泛舟,夠寫意。

水上樂園設有珊瑚魚水池,種類相當多。

玩到餓,酒店仲有BBQ晚餐,保證食到飽。

有蠔有蝦又有五花腩,質量及數量都是一流。