Gaile喊晒:冇攞2億冇第3者

自上月3日與黎明發出聯合聲明宣布離婚後,樂基兒一直身處海外,直到前晚才返港準備出席昨晚舉行的品牌活動。活動中Gaile自爆因與黎明簽了離婚協議書,故未能交代離婚真正原因!她又強調並非貪錢女人,沒有攞2億元贍養費,當提及被指有第3者時更激動落淚,更喊足10分鐘。

黎明與樂基兒(Gaile)自上月初宣布離婚後,兩人各自各精彩,有指黎明因要給Gaile 2億贍養費,故四出搵錢;相反Gaile則在外地歎世界,前晚才由峇里返港,並入住朋友位於元朗的葡萄園寓所。有傳葡萄園乃黎明物業,不過經理人陳善之予以否認,並笑言外界「太有創作力」。

昨晚Gaile身穿碎花裙出席《MARC JACOBS經典天橋時裝展覽開幕酒會》,於會場逗留約15分鐘後,便移師附近的酒店約2萬元一晚的總統套房接受訪問,談及與黎明離婚真相,她聲稱因簽了離婚協議書故未能直接回應,而提及被指有第三者時,更激動流淚,喊足10分鐘,並多次強調並非貪錢的人。

記︰記者 G:Gaile

記︰離婚後心情係咪輕鬆咗?

G:唔知點答,今日係嚟出席活動,係一個工作狀態。

記︰離婚係咪瞞咗大家好耐?

G:其實已經分開咗一後時間,八卦雜誌寫啲都唔係真,我哋有離婚協議書,要尊重法律同黎明。

已簽離婚協議書

記︰真正離婚原因?

G:大家都簽咗協議書,唔可以講,總之報道唔係真,冇第三者,寫我有船同車都唔係真!

記︰係咪拎2億贍養費?

G:冇!我同普通人一樣,自己做嘢再儲錢,唔好信唔真實嘅新聞,對大家唔公平,大家知黎明不嬲都唔會講,惟有我講。

記︰分開咗幾耐?

G:一段時間,確實幾耐唔想講,自己唔開心返咗美國一段時間,同屋企人一齊,畀自己適應新生活新開始。依家我嘅事同佢無關,佢嘅事同我無關,唔想複雜化。

記︰唔想同佢扯上關係?

G:唔係咁嘅意思,大家都係藝人,咁樣壓力會大,希望大家畀啲空間重新開始。

記︰(同黎明)仲有冇聯絡?

G:好耐冇通電話同見面,但有一啲事情會SMS往來。

記︰係咪搬晒啲嘢走?

G:已經搬走一段時間,只係冇人見我搬同上律師樓,我一早接受分開,係你哋覺得突然。

記︰離婚考慮幾耐?

G:冇話考慮幾耐,只係感情事Doesn't Work Out(不可行)。

記︰已正式離婚?

G:進行中。(說畢望向經理人陳善之求救)

記︰香港法律可以分(黎明)身家?

G:我唔清楚香港法律,我唔係咁嘅人,冇八卦雜誌寫到咁衰。(語畢即眼泛淚光)我唔係貪錢嘅人。

記︰同陳善之約滿?

(陳善之代答︰如果約滿我今日唔會喺度,大家仲有好多合作。)

記︰報道指你同黎明屋企人關係唔好,尤其黎爸爸?

G:唔係事實,不過唔想講。

記︰見過黎爸爸?

G:以前有,近排冇見。

記︰係咪有新歡Cuz?

G:(開始喊)唔係事實!

說到此處,Gaile即哭成淚人,再被問到離婚會否影響以後感情生活,爆喊的Gaile需以紙巾拭淚,並終止訪問,陳善之見狀即上前安撫。喊了10分鐘,平復後雙眼通紅的Gaile接受電子傳媒訪問,並強調與黎明離婚不涉及第三者。

記︰掙扎好耐先離婚?

G:八卦雜誌寫啲嘢唔係真,我哋分開咗一段時間……

記︰屋企人反應?

G:冇人想離婚,但感情Work Out唔到冇辦法。

記︰陳善之之前講過話你哋原本好Sweet,係突然決定分開?

G:我唔可以同你討論,因為簽咗離婚協議書,Leon都有簽名,我亦唔想提。

記︰話你收咗2億贍養費,有冇唔開心。

G:初頭我唔知,因為唔識中文,係同律師傾離婚嗰陣佢讀畀我聽先知,當時聽到有唔開心,聽到話我有第三者都唔開心。

試衫Set頭赴酒會

記︰傳黎明有第三者?

G:我唔知,唔清楚,亦唔會代佢答,我哋離婚唔關第三者事。

記︰有冇挽救過同黎明感情?

G:我同Leon關係已經係History(歷史),以後都唔再講。

昨午2時許Gaile離開朋友寓所,前往中環美國銀行中心,約3時50分離開,因該中心有不少律師樓,記者問是否到律師樓搞離婚?她笑而不答,然後乘車到IFC試衫,下午約4時再轉到金鐘Set頭準備酒會,於髮型屋內逗留至約7時才離去。

第一手消息請下載on.cc東方互動iPhone/iPad/Android Apps

專案組

Gaile強調非貪錢女人,但當被問到是否有第三者時即落淚。

Gaile到IFC試衫後再往金鐘Set頭。