Fundman睇市：內銀股散戶唔啱玩

跌市下，三隻掛牌新股反而表現唔錯，綠葉製藥（02186）收6.7元，比招股價5.92元高13.2%；天鴿互動（01980）收5.72元，較招股價5.28元高8.3%；由利豐（00494）以一送一介紹形式上市的利標（00787），即市高低位2.21及1.75元，收1.8元，以利豐除淨前後股價由11.66元碌落尋日10.1元計，乜都唔理的小股民，暫時都唔見有乜輸蝕。

新加坡政府主權基金淡馬錫（Temasek），公布截至三月底止年度的成績表，組合增長3.72%，表現普普通通，有人歸咎於淡馬錫重倉押注內銀，而內銀表現又唔爭氣，所以拖累表現。

淡馬錫重倉有理

老實講，習慣睇魚缸日日大起大跌的股民，或者好難理解一個規模達1.39萬億港元市值的基金，要爭取高回報，並非想像中咁容易，一來基金size大成咁，就算有個別投資跑出，但要同其他大部分平平穩穩的投資項目一齊計數，最終溝到淡晒。而且大型主權基金有時根本唔會考慮市值太細的公司，浪費人力物力。

今次報表，淡馬錫披露年內加注工行（01398），持股量去到H股的8.9%，此外也是建行（00939）、中行（03988）的主要投資者，令整體在中國投資比重，由一年前的23%升至25%，僅次於新加坡本土的31%。

揸咁多，是因為淡馬錫睇好內銀？其實又唔可以咁講，只不過不論從亞洲區外交角度，抑或價值投資取態，淡馬錫都無理由唔買內銀股。以尋日收市價計，工、建、中三行，市值在全球上市企業排行榜位列19、31及60，亦係頭60位之中估值最平嘅股票，預期市盈率分別係5、4.5及4.4倍，只要有8至10%增長，加埋6至7厘股息回報，以一間手上銀彈過萬億搵嘢嚟買的基金來說，實在無乜理由唔揀內銀股。當然，要刀仔鋸大樹，或者諗住炒股票博首期的小股民，內銀股肯定唔係你杯茶。

淪為賭國策工具

自一○年開始，內銀股由增長股變成周期股，主要係畀炒家用嚟賭國策轉角，舉例好似去年底，內銀股股價陰陰落，一來投資者驚今年第二季私企債進入違約高峰期，二來銀行為搶生意，以高息推理財產品可能損害息差。直到三月中，內地樓市見頂，阿爺默許之下，部分地方政府當限購令無到，人行也開始出手推定向降準，全國性降低存款準備金率之日似不遠矣，氣氛使然下，內銀股又炒番轉頭。

過去四年工行股價高低位分別為3.46至6.93元，主要則在4至6元之間上落，現價4.95元，回到上落區的中游水平。依家市場擔心利率市場化殺到埋身，銀監要求銀行將表外信貸回歸表內，加上明年初又係信託貸款到期高峰，樓市下滑銀行呆壞帳可能進入上升周期，未來兩季，內銀面對的不利消息唔少。單靠平，夠唔夠支持入市？筆者唔係淡馬錫，興趣唔大，掉番轉頭諗，如果內銀好世界，其他中資股隨時升得仲多。