股海實戰：威高試叩9元關

中資金融股沽壓不輕，其中中國銀行（03988）跌2.79%，事緣有內地官方傳媒報道有關中行的負面消息。阿莊認為，咁大間「中國銀行」，即使內部運作有改善之處，亦不至於搞到要大舉沽之哉。反之，今年以來人仔貶值，外匯資產較多的中行，應較同業可取，故眼前危機並存，股價落番3.2至3.4元區域，可留意分注上車機會。

跟炒股仔宜審慎

尋日主板十大升幅榜中，唔少都係名字陌生的二、三線股，其中排首位的堅寶（00675），又係尋日阿莊所講市值低於3億銀的低殘股仔，全日高位見1.26元，收市報1.15元，急飆55%，但市值才3億元。

阿莊要強調，股仔多陷阱，特別係魚缸中有班莊家長年靠幾隻殼變身變身再變身、將啲資產轉來轉去、公司改名，將股價舞高弄低然後供供合合掠水。自問唔想玩呢類高風險遊戲，最好都係安份守己，買啲正正路路、資產有數得計的重磅中資股或國策股。

講開國策股，又睇番醫藥板塊。尋日見隻威高股份（01066）逆市做好，收報8.35元，升3.6%。去年度，威高純利倒退，但若不計特殊項目因素，實際按年升約一成。今年首季，公司收入同比增長15%，若不計特殊項目，純利同比升約一成。

去年以來，公司重組銷售架構，並採取成本控制措施，未來一、兩年有望逐步見到成效。按業務分類而言，雖然消耗品業務目前仍是其主要收入來源，但未來的增長點應在於骨科產品及血液淨化耗材及相關設備業務，今年相關業務的表現，可為公司估值帶來上調空間。

過去兩年，威高股價波幅不離7至10元的大型上落區，上季跌至7元邊即告反彈。技術上，10日線抽穿50日線，黃金交叉加上MACD雙牛利好，有利短線走勢，若能以大成交突破250日線，有條件試叩9元大關，回吐宜守8元。