Fundman睇市：中銀香港 穩贏之選

早兩日美國調查機構數據顯示，以本港樓價中位數381萬元除以家庭每年平均收入，香港連續第三年蟬聯全球最難置業城市，在全球337個大城市中做一哥。

香港磚頭貴就係人都知，近期銅鑼灣一間著名雲吞麵舖，因捱唔住30萬加到60萬的貴租，光榮結業，諷刺是地產代理隨後爆料，新簽約租客租金去到100萬，可以估計，個人遊無限推高遊客區商舖租金下，就算麵檔過到初一，都過唔到十五。

內地房企有備而來

深圳萬科來港買殼後，夥拍新世界（00017）奪得西鐵荃灣西站住宅用地發展權，呎價仲比半年前長實（00001）同區出價高一成八，志在必得味道濃到極。當然，區區60億港元總投資額中佔兩成，對市值1,650億人民幣或者2,067億港元的深圳巨無霸萬科來說，不過係散紙，但從交易中筆者睇到幾個事實。首先是特區政府推出無耐的SSD 2.0及BSD辣招，漸漸被市場適應，發展商對後市睇法未有太大變化。

其次，每年在內地賣樓金額過千億的萬科，居然肯大雞食細米，唔少人認為係為吸收成熟市場經驗，也順便拓展融資渠道降低借貸成本，加上相比香港發展商，萬科手上大把巨富客戶可以散貨，實無往而不利。不過筆者相信，當中也涉及不少政治因素，上世紀七八十年代，港資把英資地產商逐漸邊緣化，今日中資南下挑機，只不過是歷史巨輪的一個循環。

一月至今恒指升幅得幾個巴仙，但非指數成分股炒得誇張，唔少基金都擺出「收夠籌」姿態，入市轉趨保守，形成近日即市炒作變得困難，有故事配合都只係得一兩日貨仔，為免上車容易落車難，看官仲係睇番有較佳基本因素的股票為宜。

近幾星期，中銀香港（02388）先因QFII及RQFII額度擴大，炒過一轉，加上前海概念又有份，股價輾轉由24元炒上26.75元，創五十二周新高。

唔使多講，夠平是中銀一大優勢，一三年13倍市盈率及4.8厘息，如果跌番去25.5元，股息經已有5厘，低息期下抗跌力絕對唔使懷疑，況且本地資產質素中短期無惡化迹象，業績能見度高，再者，身為境外人民幣結算行身份，加上短期可能開展前海跨境人民幣貸款業務的憧憬，應該係贏面大，輸面有限，即使唔升唔跌，淨收息已經可立於不敗之地。