Fundman睇市：百麗高增長故事褪色

上周四西班牙拍債，市場反應唔錯，周五意大利的拍債成績也算理想，30億歐元的一四年到期國債，中標息率由上次的5.62厘落返去4.83厘，大致可見，歐央行向商業銀行提供三年期1厘平錢，曲線入市買豬債措施可行。歐債危機稍有紓緩，「話都無咁蹺」評級機構又放毒箭，標普周五將九個歐元區國家主權評級，包括法國及奧地利兩個歐元穩定基金（EFSF）出資主角的主權評級，由AAA降至AA+，意大利及西班牙仲連降兩級。

消息一出，星期五晚已見歐股反高潮，由升轉跌，德法股市分別跌0.6%及0.1%。可是，歐豬債卻未見恐慌，意、法、西債孳息僅微升。若非善忘，去年八月美國失去AAA貸評，假如以為世界末日睇淡美債，經已輸死（十年債孳息回落到近日的1.85厘，債價向上），尤其美國經濟數據顯示，近期復甦力度有轉強迹象，甚至有公開市場委員會委員表態，認為美國唔需要QE3，證明債主唔理你有幾窮，最緊要係信唔信你有錢還！

歐債買家未見動搖

從近日歐債息大幅由九、十月高位回落，證明在信與不信之間，歐債買家好似祖國鐵道部大員咁，揀咗信。如今落實降級，將所有可能發生的衰嘢一次過引爆，未嘗不是好事。

中國十二月外匯儲備連續兩月下跌，內地市場解讀為熱錢流出，滬綜指在周末假前跌30點，收2,244點。查實，去年十一月外商直接投資（FDI）出現二十八個月以來首次負增長，跌9.76%，唔使睇外匯儲備餘額，跨國企業從華撤資，大家係心知肚明。講到底，A股借消息消化由兩年半谷底2,132點開始的反彈，觀乎滬綜指連跌三日，香港H股紋風未動，反映跨國大孖沙預咗內地第四季及今年首季數據唔會好睇，繼續趁壞消息入貨。

上星期，鞋王百麗（01880）缸邊傳聞多多，路邊社消息話有分店商場業主，透露銷售唔多理想，周四傳街外借貨沽空緊張，周四收市，見沽空成交由9%升到18%，筆者仲未為意，但到星期五終於有答案，百麗透露第四季同店銷售僅得8.2%增長，對比第三季的18.5%，增幅大為放緩。公司解釋原因，包括冬季款式部分提早在第三季已推出、第四季天氣比以往溫暖、減少了推廣開支，以及因應市況調低產品售價。姑勿論影響是否短期甚至一次過，過去幾季鞋王同店銷售增長率，一直都比管理層指引高3%至4%，周五股價的急挫，再一次說明高估值股份，可以容許業務不能達標的空間十分細。周五，百麗沽空比例升至18.6%，股價跌6.9%，收11.86元。

一○年九月，百麗入選藍籌，今日股價比當時仲要低18%，會否像富士康（02038）等，中了新貴魔咒，在增長最強的時候入選，之後無以為繼？睇番百麗現價一二年市盈率約15.9倍，的確比歷史平均的26.7倍低，但以17至18%年增長，PEG僅僅低於一倍的合理水平，未算特別便宜，或者同店銷售未來一兩季可能谷底反彈，但盈利基數變大，加上炒內需的故事開始褪色，股價看來不容易重返去年中高位。