Fundman睇市：中銀股息更勝存款息

德國國會表決金融穩定機制（EFSF）前夕，美股前晚由升轉跌，插179點收，正當好友以為難逃一劫，多得颱風納沙，期指結算日歷史性地休市，結果令九月期指期權結算，加埋第三季基金季結一齊發生，到底最後好友淡友邊個着數咗？唔使等幾耐今日九點三會有答案。

尋日亞洲時段，日韓股市唔單止由跌轉升，仲愈升愈有，日經指數升85點，收8,701點，韓股升幅更超過2巴仙，升46點，報1,769點，市後解畫話兩地投資者預期德國可望順利表決通過EFSF！唔講唔覺，年初開始計數，香港乃全亞洲表現最差股市之一，累跌21.8%，同日韓股市的14.9%及13.7%跌幅一拼，仲以為歐債危機風眼位處香港。

中港經濟日趨融合，連股市走勢都同氣連枝，今年上海及深圳股市分別跌15.7%及22.1%。之前話滬綜指2,400點乃係鐵底，點知一個唔該就穿埋。中央收水，近期可見溫州走佬潮、200厘高利貸、內房股財政出問題的消息此起彼落，可惜從人行行長周小川近期言論，未來兩三個月內人行掉頭放水甚至降低存款準備金率的機會，仲係微乎其微。

A股調整恐未完

A股仲可以跌幾多？技術上，滬綜指由○七年金融海嘯前高位6,124點見頂回落，跌至約1,664點見底，之後反彈到○九年八月，見3,478點行人止步，只係短暫突破4,460點跌浪的0.618反彈阻力3,368點，一日未能收復失地，意味A股只係處於大型調整後的整固期。

假如由估值考慮，A股歷史有限，可能影響準確度，從有限的資料，滬綜指估值最高見過62.6倍，時為二○○○年十一月，最低12.6倍，正是尋日收市，而歷史平均33.4倍，現在只係及三分之一多啲，驟眼睇A股好平，可是考慮指數權重高，市盈率較大部分股份有折讓的幾隻重磅內銀股，可能拉低了整體數字。如果純以資產價值衡量，滬綜指市帳率高低位，分別在6.86倍（○七年十二月）及1.58倍（○五年八月），現時是1.96倍，意味着滬綜指可以跌多19%去到1,906點。基於指數已跌穿了長期支持位2,700點，似乎短期向下機會都幾高。

洗倉潮浪接浪，連本地銀行都頂唔住，大摩話恒生（00011）未來盈利能力呈向下趨勢。報告一出，恒生股價前日被質到逾兩年低位，見95.4元。

的確，本地銀行存貸比率處於近年高位，樓市升浪近八年，資產質素再改善空間唔多。然而，無upside是否代表只有downside？筆者有點保留。由金管局早於去年已限制豪宅按揭成數指引下，銀行面對樓市爆煲的風險已經比以前低，未來業績有機會因為貸款需求放緩，橫行或者輕微調整，但大跌的風險仲係唔大，始終香港銀行遠離歐美債務危機風眼一段距離。

比較下，中銀香港（02388）會較合心水，儘管未來兩年業績較大機會持平甚至輕微倒退，但預期股息率6.75厘，接近歷史高點7厘水平，即使打個七折都有4.9厘，好過存錢入中銀，18元樓下可開始收集，萬一外圍風吹草動，拋售去到15至17元，預期股息7厘樓上，更妙。