陳豪認茵情 洞房慢慢嚟

昨日8號風球高懸下，陳豪與陳茵媺仍然出席活動預演婚禮，藉機把「雙陳戀」公告天下！直認對方是滿分女友的陳豪，被問到下一站是否洞房時即面紅，還傻笑說：「慢……慢慢嚟！逐步嚟！」

當紅小生陳豪與上位小花陳茵媺（Aimee）雖一直否認拍拖，但陳豪日前被拍得於深井愛巢中享受女友的甜蜜餵食，加上樂易玲「開綠燈」，雙陳不認不認還須認！昨日8號風球高掛，但陳豪與Aimee仍出席《莎莎婦女銀袋日》記者會，Aimee獲安排穿上類似婚紗的晚裝現身，在長廊與陳豪步下似足行婚禮！未知是否太緊張，兩人出場時企到離行離列，記者起哄後才乖乖企埋，但陳豪尷尬得全程雙手放後，不肯翹手。合照時，一對「新人」與嘉賓「敬酒」，儼如與雙方家長合照。如此浪漫氣氛下，雙陳受訪時終公告戀情！

陳豪：豪　陳茵媺：媺　記者：記

記：今日好似婚禮喎？

豪：（面紅紅）乜搞到我哋咁尷尬？（預演婚禮？）開心嘅！之前畀人影咗都開心嘅！總之係平穩發展。

記：你哋係咪同居？

豪：唔係！（連講三次）係我探佢！（探佢點解會餵你食嘢？）……好正常啫！（叫你翹手又唔肯？）我尊重大會啫！要扮Cool，但扮彎咗！

記：你哋正式承認拍拖？

豪：（鼓起勇氣）我哋都抱大方態度，冇諗住否認喎！只係唔想將某啲嘢掛在嘴邊！（Aimee係滿分女友？）直頭爆燈！（打算同居？）未去到呢個階段，唔好咁心急！（每次都留夜？）只係煮吓飯仔啫！

記：一星期上愛巢幾多次？

豪：唔定㗎！呢排要開工！（有結婚衝動？）一步慢慢嚟啦！（你哋打風都打唔甩？）係呀！正正係呀！

記：今晚會唔會洞房先？

豪：（笑到面都紅晒）慢……慢嚟，逐步嚟！依家係平穩認識階段！

記：上愛巢唔使用手食嘢？

豪：（笑着望Aimee）唔識答，你都唔好答佢哋！（咁你隻手用嚟做乜？）對手用嚟執碗。

遲啲安排見家長

記：Aimee，你畀人影會唔會唔開心？

媺：我要Shopping囉！因為要裝番啲窗簾！（有傳間屋係陳豪租畀你？）唔係！係我租，如果佢畀錢就租貴啲啦！（爹哋見過陳豪未？）未！

記：陳豪，你媽咪見過Aimee未？

豪：（甜笑）未見過！但媽咪話睇電視覺得佢好好囉！遲啲安排！

記者催逼下，雙陳終於翹手合照。兩人離開時，在經理人陪同下坐車往尖沙咀。Aimee落車後再往取車，但在商場迷路，問到下一站目的地？她說：「返深井！」戀情公告後，好友如麥長青及高海寧等在微博送祝福。