Fundman睇市：農行步入反彈安全期

近期評級機構出招實在太過頻密，愛爾蘭信貸評級被穆迪降至「垃圾」級別，心灰意冷的股市有點「闊佬懶理」，前晚美股跌幅遠比亞洲時段場外期貨小，道指埋單跌58點，收報12,446點。中國公布第二季GDP升9.5%，好過市場預期，為股市帶來振奮作用，上證綜合指數重上10日及50日線樓上，收市升40點，報2,795點。

成也內銀，敗也內銀。A股解禁，加上策略股東減持消息，內銀股近期紛紛跌至四腳朝天，但尋日農行（01288）發盈喜，就帶動一眾內銀股死貓彈，恒指升263點，報21,926點，但大市前日大跌成交過800億元，尋日反彈縮番到649億元，可見基金仍然無意思追貨。睇番恒指三日內由高位22,835點跌1,187點，去到21,648點，由低位升番278點，都只係三日跌市累積跌幅的兩成三，如果彈番跌幅五成會見22,241點，相信係未來幾日好友的基本目標。

國藥短期宜迴避

穆迪揮動紅旗，令信心薄弱的基金經理四周圍搵地雷嚟引爆，尋日國藥（01099）股價跌5.9%或者1.45元，收報23.15元，跌到廿一個月新低。問投行老友們國藥何以能醫不自醫，解釋都幾令人意外，據聞有大孖沙賭國藥八月下旬公布的中期業績麻麻，估佢在未來幾日內會出嚟向下修正營運指引，所以隊定先搵真銀。

史提芬最初都唔係咁信，但篤一篤機睇番近幾日沽空，又真係比平時高，昨日有360萬股，就係一個月新高，再睇過去四個交易日，沽空佔成交比例介乎31.2%至54.8%，即係話有二至三分之一成交是沽空客所為。事實上，即使國藥一一年業績達到分析員目標，交出16.46億元（人民幣﹒下同）利潤，市盈率都高達26.8倍。近期民企風波，中資股遍地屍骸，對比通街平貨，國藥即刻變成貴價嘢，短期最好避一避為上。

農行發盈喜，預期上半年淨利潤會比去年同期升45%以上，按去年中期賺458.4億元計，換句話說，今年中期農行至少賺664.68億元，達到大行預測全年利潤1,254.5億元的53%。睇番農行第一季賺340.6億元，增長36.4%，簡單減數，第二季將會比去年同期至少錄得55.3%增長，賺324.1億元。

壞帳陰霾仍未散

農行預期市盈率8.5倍，再睇餘下三大行，工行（01398）8.1倍、建行（00939）7.6倍、中行（03988）七倍，無一間有雙位數估值，就連小即是美的交行（03328），估值都逼近歷史下限，一一年得7.3倍。有人話平但亦有人話貴，皆因內銀股不良貸款率去年齊齊創銀行業重組後新低，三大行只係1至2%，農行亦由○八及○九年的4.32%和2.91%，降至去年只得2.03%，股價插水，估值表面上好低，正反映預期內銀未來面對不良貸款及撥備減值飆升的風險，尋日有大行報告話依家內地地方債達10.7萬億元，等於全國GDP的27%，有五成三將會在未來三年到期，4萬億元投入大白象，未來幾年有幾多壞帳浮面，係市場所憂慮的。

純以農行的雙底走勢加埋盈喜，好友有一段安全博反彈時間，撇開這兩個短暫因素，內銀長遠面對的問題，相信會持續影響估值，難望大升。