嘉玲唔吼偉仔放假造人

劉嘉玲與老公梁朝偉均是大忙人，難得偉仔放假，被問到有否享受二人世界？她說：「我唔係好需要人陪，我個人好獨立。（偉仔想你陪？）佢都好獨立嘅！不過我哋啱啱去咗印度，因為我哋有個上師有講學，所以去咗兩、三日。」問到有否趁機努力造人？嘉玲笑着說：「又係呢個問題，其實真係唔使戥我哋急！因為我哋真係唔急！」

談到鋒芝婚變，嘉玲謂別人的私事很難評論：「希望佢哋將來嘅路會走得更舒服、健康同快樂！（你有咩夫妻相處之道？）每一對夫妻都唔同，相處係冇一個方程式。」她表示和鋒芝不熟落，反而與拉姑狄波拉較熟，但現階段不敢打擾對方：「我諗佢依家煩到變咗七個頭。（婷婷爆拉姑冇得見兩個孫而痛哭？）我完全明白佢嘅心情，佢兩個孫又咁得意，不過始終清官難審家庭事！」另外，有傳新加坡歷史大片《1965》即將開拍，該電影以新加坡內閣資政李光耀爭取新加坡獨立為背景，主要演員包括梁朝偉、張曼玉及荷里活實力派女星茱莉安摩亞等。