Fundman睇市：渣打長揸回報豐厚

六月期指結算加上半年結在即，尋日港股無好淡互攻場面，反而基金經理繼續有落雨收柴味道。恒指由早市升過176點，到收市無起跌，成交622億元，是接近兩星期最少。牛市每次調整都係基金入貨之時，相反熊市每次反彈都見基金趁機減磅。睇番今浪恒指由23,708點，短短十四日插到落最低21,509點，共跌2,199點，見底後足足七日時間才升得553點，僅及跌幅四分之一，反彈之乏力，係金融海嘯後首見。儘管今日港股市盈率唔夠十二倍，已接近歷史九至二十二倍的下限，可惜係近期市況氣氛差，21,508點應該離底不遠，但未必係今浪低位所在。

比亞迪（01211）首季業績認真震驚全場，營業收入117.1億元（人民幣．下同），歸母公司之股東利潤僅2.67億元，大跌八成四。管理層解釋係汽車業務下滑而管理費用及財務費用增加所致。睇番大行對一一年度預測盈利介乎10.96至35.36億元，平均24.13億元，換句話，首季只得全年預測一成一，看情況分析員短期好大機會向下修訂預測，使股價雪上加霜。

藉回歸A股消息，近期比亞迪由低位21元（港元．下同）彈番去25.9元，去到50日線25.74元附近又再隊過，睇番三月都曾經出現短暫反彈，一模一樣又係去到50日線掉頭。技術上，一日唔真係突破，博反彈的都唔好當佢真正見底為宜。

六福可候回吐吸納

同樣出業績，珠寶股六福（00590）成績相當唔錯，達到預期上限，全年賺8.66億元，大幅增長六成三，每股盈利1.71元，派末期息42仙，刺激股價創35.6元的收市新高。一直深信，珠寶業可能是市面上最能夠抵禦貴租的零售股。事實上，去年租金佔六福總銷售額3.5%，對比時裝及餐飲股平均的20至40%比例，即使遇到續約加租一至兩成，只要在珠寶單價提高0.5至1%，就已經足以應付有餘。大環境今年有周大福上市，認識保薦的賓架話至少要二十五至三十倍市盈率，相信對六福、周生生（00116）等有拉動作用。不過，以股論股，○九年至今六福估值介乎9.5至20.3倍，大行明年業績預測「上限」為10.93億元，相當於市盈率17.7倍，或者短期可以再有一至一成五上升空間，但筆者認為較穩陣係等回吐至30至31元附近，先至再諗入貨。

估值仍處偏低水平

渣打（02888）連升兩日，尋日再升3.8元，報198.3元。該行透露首五個月收入及溢利都有雙位數字增長，亦預告增長幅度可以延續去到六月底止半年結。對比被北美業務拖累的滙控（00005），筆者更喜歡渣打，尤其是亞洲及中東新興市場發展策略，避過歐債危機及疲弱的美國消費信貸市場，可惜今年股價表現仲係唔算理想，年初至今跌8.2%，一一年市盈率接近後海嘯時期11.9至16.5倍的下限，得12.4倍。筆者近日想，問題唔係出於渣打本身，反而係通街平貨，連巨型內銀股估值都只得單位數的當下，渣打要長期維持溢價唔容易，但以接近十二倍估值及3厘股息，195元樓下的渣打，筆者依然深信，買入並持有兩至三年，將會有豐厚的潛在回報。