Fundman睇市:雅居樂可買第一注

溫總上星期在FT撰文,指內地通脹已經受控,港股狂升412點,到底係咪代表事實的全部?睇一個月上海銀行同業拆息依然企穩7.92厘樓上,內地水緊情況完全見唔到有改善,港股亦為上星期的死貓彈,來個修正,尋日恒指跌130點,報22,041點。本周只得四個交易日,周三期指結算,周四基金半年結,由於上半年唔少股票基金輸到嘔,即使有粉飾活動,規模恐怕有限,睇嚟本周市況仲係一個靜字機會比較大。

財經雜誌《巴隆氏》揣測股神巴菲特可能趁比亞迪(01211)回歸A股前後,沽貨離場,理由是旗下電動車銷情麻麻,手機大客諾基亞(Nokia)業績每況愈下。

以前每有大手減持傳聞,股價必定九死一生,奇怪在《巴隆氏》今次放冷氣,比亞迪反而逆市升1.3元,報25.35元。○八年股神8元接貨,即使今日25元沽貨,三個開回報足夠恨死隔籬,但以股神金漆招牌,80元唔沽淪落到25元沽,如果真係減持,都算係老貓燒鬚矣。以日前低位21元,比亞迪一二年市盈率15.8倍,即使畀佢十倍估值加埋新能源環保概念,20元樓上點都站得住腳,或者巴翁確係錯過最佳沽貨時機,但今日至沽,講來講去又唔多似。

食品股成基金點心

愛股雨潤(01068)慘遭洗倉,狂跌5.1元,報20.6元,同班投行老友八吓,原來坊間流傳來來去去幾段舊聞,最有「創意」要算係基金股聞風喪膽的渾水基金,準備同佢出報告,但聽落係吹水料居多。

史提芬認為講來講去都係錢作怪,市場氣氛唔好,獨剩食品及消費類股份估值仲係高企,對沖基金「向下炒」搵食至係理由。睇番六月十七日,雨潤股價仲有28.4元,之後五個交易日明顯異動,沽空成交佔全日總成交比例高企,維持在55%、48.4%、32.2%、38.2%及39.8%,如果尋日21元樓下平倉,幾日勁執兩成幾真係好過去搶。睇番尋日沽空2,182萬股,唔算少,唔敢講股價已經見底,但手上假如食品股揸重貨,最好留意沽空有冇異動,小心。

下星期,內房股應該陸續公布上半年銷售數字,由六月中開始按周表現有回勇迹象,預計應該會比四、五月的淡靜市好,沉靜多時的股價,有機會見反彈。

銷售達標機會渺茫

搵平貨博反彈,第一隻想到雅居樂(03383),預期市盈率唔夠八倍,而過去兩個月完成2億美元銀團貸款,唔怕突然高息發債拖低股價。回顧五月份,雅居樂銷售收入20.3億元(人民幣.下同),同首四個月累積115億元或者平均每月28.75億元比較有點失色,累積五個月交出135億元銷售額,要達全年370億元目標,意味着餘下七個月,每月要交到33.5億元數,以中央打壓樓價手段之硬,機會渺茫矣。

史提芬一直等內房股調低全年銷售目標的一刻撈貨,暫時睇嚟,市場開始有晒心理準備,雅居樂股價早前跌到11元附近,拒絕再跌,較二月低位9.5元高出15%,等入市的,或者可以在11至12元先買第一注,等七月初,六月數據出籠可能調低銷售預測引起震盪(恐怕未必係跌),再將餘下一半注碼入市。

跨媒體地產網新居入伙 幾萬個精選樓盤 歡迎睇樓!

「Money18免費即秒股票報價網站」現推出8升級功能,財經資訊,實時實發!

史提芬