蔡芳裕寧做反派

蔡芳裕誓奪冠軍指環完成最後任務！今晚修頓室內場爆發甲一籃球季後賽總決賽Game3，總比數領先2:0的永倫只要再挫南華即可封王，換言之今仗極可能是永倫中鋒蔡芳裕的告別戰。該名37歲老將無懼擔當大反派角色，誓要奪得冠軍指環為其籃球生涯畫上完美句號！

縱橫甲一籃壇18載，蔡芳裕有三件事特別難忘：「第1件事就係16歲嗰年搭地鐵，畀當時三唔識七嘅教練徐錦祥睇中，於是就跟咗佢去打波，諗番起都好似啲星探騙案咁！」及後蔡芳裕學滿師加盟展時開始甲一生涯，並於97年協助威立勇奪亞洲冠軍球會盃，阿裕坦承當時只抱着遊埠心態出征，誰知最終竟稱霸亞洲，實屬一段奇妙旅程。

一個月操足26日

阿裕續稱：「至於第3件難忘事就係依家，近年我每月至少用26日嚟操，目的係為今晚捧盃完成『三連霸』！」被「擁南躉」視為頭號柴台對象的蔡芳裕，習慣了在噓聲中作戰，還說愈多噓聲愈開心：「佢哋噓我只係想影響我嘅表現，證明我打得好，我唔介意做反派，愈多人噓我就代表球市愈旺，如果有7千人一齊柴我台，我仲開心！」

現時抱着「打1場、少1場」心態的蔡芳裕，坦言今晚有可能是告別戰：「37嘞，都已經唔細！雖然好想學吳柱業咁打到38歲，但一切都要睇球隊嘅需要同計劃！」無論効力母會展時，抑或威立，南華、福建再到永倫，蔡芳裕每次都能為球隊贏得錦標，今晚若能再下一城便能助永倫取得「三連霸」，阿裕亦將會奪得第3隻冠軍指環（自07年起加設）。

改制後未試過派3蛋

今季5次「華倫大戰」全由永倫勝出，但自從05年實行總決賽5場3勝制後，從未試過有球隊能橫掃對手3蛋捧盃。南華教練梁達強就對爭標未絕望：「5場敗仗當中，南華一場比一場進步。上場僅負對手嘅關鍵球係誤判，輸波係冇運但證明我哋係有本錢贏波。」