Fundman睇市：聯邦制藥搶閘彈出

上周五，港股跌257點，報21,695點，十二日內跌足十一日，可能股民同筆者一樣，漸漸對跌市麻木晒。

見到父親節食肆一桌難求，山頂豪宅呎價逼近10萬元，推出大半年手機愛瘋4居然仲奇貨可居，「經濟係咪真係咁好？」可能是唔少市民心中的不解之謎，這都惟有怪美國見識過日本及香港樓價大跌，負資產對經濟衝擊的嚴重性，過去兩年透過不斷印銀紙，令美元貶值來取代美國樓價下跌。

今個星期二、三係第二輪量化寬鬆（QE2）玩完之前聯儲局最後一次議息，伯南克會否暗示明示有其他方案拯救經濟，大家不妨坐定定睇清楚。有趣的是，全世界包括債王格羅斯都話QE2之後無咗聯儲局呢個大買家，債券牛市勢必玩完，可是實際情況係過去兩個月，十年美債升極唔停，孳息由四月高位3.59厘，跌到3厘不保，上周五見2.94厘，似乎債市炒家已經有晒心理準備QE3會面世，但匯市卻有另一個睇法，美匯指數五月初見72.95低位之後，有拾級攀升之勢，美元揸家係唔信美國會再開印鈔機炮製QE3？抑或認為歐、日的問題更為嚴重？筆者希望今個星期伯蛇的會後講話，可以畀到大家答案。

復建居屋最怕摸頂

上周末，特區政府放風話會復建居屋，筆者覺得諷刺嘅係○七年唔提、○九年唔提、一○年都唔提，曾班子任期剩一年多，肯定個波要交畀鐵三角至開聲，難怪個個話特首同地產商打工。

回顧過去一年，港府先來定期賣地，之後又推出短期易手懲罰性印花稅，到最近減按揭成數三大勁招出台，如今效果未見，又諗住出第二招，章法相當亂嚟。最怕學似董生當年，摸頂搞個八萬五出嚟建居屋養老鼠就弊，居屋唔係免費午餐，政府只係按市價加上折扣賣畀市民，既然金管陳總講到此時此刻利率風險咁高，樓價隨時掉頭，更加唔應該喺呢個時候推市民上車，如果樓市萬一真係逆轉，想搵人買更難。與其復建居屋，倒不如改善公屋設計、增加供應、同埋提高申請公屋家庭入息上限好過喇。

跌市中搵股票買，筆者第一時間想起藥業股，主要考慮是去年內地醫藥改革，發改委要求限制藥品銷售價格，大部分藥股較大市早一季度見頂，不少甚至已經跌足一年。基金愛股聯邦制藥（03933），唔經唔覺，股價今年三月還有接近15元，上星期連10元不保，周四見過9.66元，股價唔見咗三分之一。

基金揸重貨有支持

聯邦主要生產中間產品及原料藥，藥品限價影響對其客戶影響大於公司本身，早前公布首季銷售增長介乎18至22%時，便透露過藥品限制的影響，只相當於銷售3至5%。今年公司有5隻胰島素產品獲國家藥品監督局批准，會是業績的一大動力來源，儘管原材料成本上漲，可能影響毛利率由接近四成的高位回落，而分析員的預測似乎也充分考慮到有關影響，估計盈利增長率會由過去兩年的25%及80%，回落到20.7至24.2%，以10.9倍市盈率，比歷史平均估值11.5倍低之外，抵買比率（PEG）亦去到0.52倍。

另一個筆者認為聯邦值博的原因，是該股基金股東不少，VP同歐洲股神掌舵的富達揸重貨，經驗告知，通常市況見底，這類基金揸重貨、業績唔差而估值已夠吸引的股份，在其他大孖沙買盤及基金粉飾支持下，反彈力往往最強。