Fundman睇市:國美買貨毋須心急

近期內地缺水情況,直接影響到香港股市表現,近兩星期的基金股洗倉潮,據聞就係唔少QDII基金為應付內地散戶贖回,要錢唔要貨所致。一眾新資源股今次慘遭洗倉後,幾時可以恢復原狀,筆者唔敢亂估,元氣大傷加埋炒上變得蟹貨重重,無貨者仲係搵過其他板塊好過。

上星期五,上海人民幣銀行同業拆息回落奇速,隔夜息由5厘樓上,回到2.8厘附近,似乎中央見到水緊得咁嚴重(年息過200厘的地下錢莊都有人問津),突然叫暫緩再發三年央票,起到紓緩資金緊張的作用,比較意外的是,A股完全冇反應,上星期五再跌26點,收市報2,709點,將連跌日數紀錄增加至七日。

展望今個星期,內地股市相當受五月份的PMI數據左右,早前滙豐研究部出過五月PMI數字預覽,跌到51.1的十個月新低,反映中央為對抗通脹,連番收緊市場銀根,已經對製造業起冷卻作用,亦因為市場對經濟硬着陸都已經抱着相當悲觀預期,史提芬反而相信今個星期數據即使再差,股市進一步受到負面衝擊相當有限,掉轉頭炒會比低位加入睇淡更具勝算。

港股23000點可入市

港股跌一日反彈四日,恒指上周五升217點,報23,118點,五日累積計算雖然仲要跌81點,但比周三低位反彈接近600點。技術上重返10日線即22,944點樓上,如果今日依然守住,22,519點短期見底機會唔細。

值得留意的是,雖然今晚美股無市,預料市況會相對平淡,但上周五收市所見,六月期指轉倉以好倉大戶相對積極,六月期指收23,005點,比除息後的理論合理價22,949點高水56點,近期而言都算罕見,即使上周五美股升幅不及預期,但假如今日恒指回到23,000點附近,將會係期指或者牛證炒家的另一個入市良機。

融資成本下降加上銷售增長稍勝預期,家電股國美(00493)首季季報表現唔錯,銷售收入136.7億元(人民幣.下同),增長16.1%,淨利潤5.52億元,同比升65.7%,季報一出,上周五國美股價急升0.23元或者8.19%,報3.04元。

季績表現優於預期

筆者認為,季度業績高過預期,是急升誘因的其中一部分,認識的基金界朋友唔少認為,漫長的管理層人事鬥爭,導致傳統基金在國美的持股量普遍唔高。

當今日管治團隊開始穩定落嚟,吸引機構投資者逐步重新「睇番」國美,而其股價目前估值唔高,急升後一一年市盈率講緊16.6倍,中央落實未來幾年大力推動保障房建設,有利家電需求維持強勁,如果捧單一品牌家電生產商,估值比國美還要高,基金何不選品牌及競爭風險相對較低的家電零售業。 

國美的唯一缺點,可能係自三月中以來,股價由2.34港元低位起步,到上周五突破3港元關口,累積升幅已經唔細,反之,主要對手蘇寧(A股代號002024)跟隨內地股市作出調整,股價輾轉由年初高位14.5元回落,到上周連12元也不保,收報11.85元。

向來國美一大賣點,就係比蘇寧「平」的優勢都暫時無咗,目前後者的預期市盈率大約十六倍,和國美相去不遠,筆者依然看好國美中長線的表現,但就認為投資者如果有心中長線買的,可以等一等,於2.8至2.9港元入市比較合適。

跨媒體地產網新居入伙 幾萬個精選樓盤 歡迎睇樓!

「Money18免費即秒股票報價網站」現推出8升級功能,財經資訊,實時實發!

史提芬