Fundman睇市：中國食品買貨唔使心急

歐洲央行暗示可能會有歐版量化寬鬆出台，美國亦可能擴大QE2的規模，兩單消息，斷估都值得股市興奮一陣子，殊不知港股尋日依然故我，全日走勢幾乎係星期五的翻版，先高後低，令人失望。

尋日大市早段一度升過291點，中段開始級級落回到原點，港股沽家收市前一刻齊齊要錢唔要貨，恒指最後倒跌82點，收市報23,237點。市後解釋，藉口話市場仲係擔心中央經濟工作會議前後，人行會提早送聖誕禮物畀淡友，趁一○年結束前加多0.25厘息，有趣嘅係滬綜指尋日仲有0.5%升幅，港股投資者，顯然對人行加息悲觀得多。

地產股大好友瑞銀，指出本地發展商自特區政府出招後，股價平均跌6%，內地發展商同樣唔好過，憂慮內地轉向收緊貨幣政策，股價平均跌3%，只有收租股及REITs不受影響，平均仲有2%升幅。但瑞銀認為不利消息已充分反映，中港兩地地產發展股，將受惠於喜出望外的盈利表現，預期十二月份會有反彈。瑞銀睇好的名單，包括估值較「便宜」的SOHO中國（00410）、信置（00083）及富力（02777）。反之，較不睇好嘅係希慎（00014）、信德（00242）和合生創展（00754）。至於領匯（00823）、龍湖（00960）及新地（00016）則屬中性。

港樓市量跌價唔跌

曾特首話打擊炒樓新政初步收到成效，筆者聽到i晒頭，反映樓價嘅中原城市領先指數，在政府出手後，唔單止唔肯回頭，仲升多兩個禮拜，假如曾特首所謂成功，係打擊樓市「交投」太活躍，唔係「樓價」，咁的確好成功！難怪地產代理要搞到媽媽聲。

樓價會唔會因為懲罰性印花稅回落？筆者認為機會唔大，最多只係令買入唔夠兩年嘅唔放盤住，令供應減少。同一時間，準買家以為政府措施真係有用，响度等唔買住，令需求同步減少，結果係個價唔落，但成交量大跌。

為了壓抑通脹，市場預期中央會陸續在各種民生必需品項目上，採取鐵腕價格管制，政策風險下，一眾食品股幾乎無一幸免。有趣的是，連一些似乎無關係的股份都被拖埋落水，像中國食品（00506），分工後已不再涉足食油提煉等民生產品，主攻葡萄酒、飲料、廚房食品等休閒食品，屬較少受監管的項目，然而股價今年仍跌咗24%，即使以十月初起計，也跌23%。與經常作為比較對象的酒業明星股張裕A（000869）一比，後者都係跌17%，更顯中國食品走勢弱得交關。

股價表現大幅跑輸

老實說，葡萄酒、零食等唔多唔少會受原材料漲價影響，中國食品上半年業績跌41%，去到1.79億元，就係受此所累，毛利率由28.5%跌到27.1%。○七年內地通脹狂升，中國食品遇到相似問題，毛利率由超過三成跌到最低的24.5至25%，相比之下，今日情況其實不比當時嚴重。股價表現不濟，相信同估值高、毛利壓縮期基金缺乏看好理由更有關係，一一年的預測市盈率及市帳率分別為22.2倍及2.24倍，較歷史平均的15.5倍及1.57倍均高出四成三之多。當然，無金融海嘯同時發生，今次應不至於去到○八年的六倍市盈率或者一倍市帳率才止步，過往經驗當通脹見頂前夕，也是股價見底之時，等買者看來不用急於一時。