佘詩曼失望 陳豪輸獎贏民心

陳豪前晚失落「我最喜愛角色」獎，僅獲被指是「豬肉獎」的「最佳專業表現大獎」，連他也不明為何獲頒此獎，惟他表示輸獎贏民心才重要；而佘詩曼則感到失望，希望明年賽果令人滿意！

無綫的《萬千星輝頒獎典禮2010》前晚圓滿結束，各獎項亦名花有主，惟賽果卻惹起不少爭議！陳豪在《公主嫁到》的「金多祿」一角表現出色，卻敗給勁敵林峯，失落「我最喜愛的電視男角色」獎，僅獲「最佳專業表現大獎」。

備受視迷力撐應獲「我最喜愛角色」獎的陳豪，接受電話訪問表示，知道很多人支持自己，既開心又感動：「最感動係收到攞唔到獎嘅短訊，仲多過收到攞獎嘅短訊，攞咗人心已經好足夠，輸獎唔緊要，贏民心先最開心。」問到緋聞女友廖碧兒有否予以支持？他說：「有嘅！有嘅！」

咖啡論作比喻

陳豪又以「咖啡論」作比喻，他表示享受炮製咖啡過程，雖然未必能迎合每人口味，但誠意搭夠，可以感動到大家：「杯咖啡未必個個啱飲，但會堅持整落去，希望做到一杯可以滿足大家嘅咖啡。」陳豪又謂拍《公》劇已賺了很多：「喺外面攞嘅獎同拍嘅廣告，已經攞到半個贏字，當然攞埋個獎更完美。」

談到「最佳專業表現大獎」，陳豪卻一頭霧水：「唔明點解頒呢個獎畀我，只知係行內人投票，有獎攞可以上台致謝已經唔錯，當呢個獎係一粒糖。」

而贏得「我最喜愛的電視女角色」獎的佘詩曼，昨日已再飛無錫開工，劇組人員亦替她慶功！談到頒獎禮引起爭議，阿佘接受電話訪問時說：「一切已塵埃落定，係改變唔到事實，希望出年賽果令人滿意！」對於未能與陳豪拍住上攞「我最喜愛角色」獎，阿佘也感到失望：「不過阿峯（林峯）攞我都開心，而（梅）小青攞劇集獎，仲開心過自己攞獎。」

對賽果感錯愕

此外，《義海豪情》雖擸盡主角及配角四個大獎，但敗給《公主嫁到》，失落「最佳劇集獎」，有觀眾對賽果感愕然，更指《公》劇以網上點擊率充當收視點公布，相反《義》劇的收視率，沒有包括網上點擊率。

《義》劇監製李添勝亦不諱言失望：「打擊咗手足士氣，但祥仔同雯女冧莊，係唯一安慰。（有觀眾都戥套劇唔抵？）冇辦法，控制唔到，真係答唔到你呢個問題。（有傳雯女祥仔換獎？）我真係唔知，以戲論戲，雯女同祥仔都好戲，但唔代表阿佘同陳豪演得唔好，只不過冇一個劇本畀佢哋發揮到。」

《公》監製梅小青則說：「全年最高收視係冇加網上點擊，純計收視，我都冇心理準備攞獎，宣布嗰刻呆咗，好愕然，其實《義》係好好劇集。」