雯女撐中女自強

黎耀祥與鄧萃雯冧莊視帝視后，雖然簽約換獎傳聞此起彼落，但他們一於少理，前晚漏夜與粉絲慶祝，雯女更呼籲中女要努力向上，祥仔則自爆想過退休！《義海豪情》在廣州地區揚威，大結局一夜狂吸1,710萬觀眾！

祥仔及雯女雖然並非無綫親生仔女，但前晚罕有地憑《巾幗梟雄之義海豪情》冧莊稱王封后，惹來「以約換獎」傳聞！不過，二人懶理傳言，得獎後先替官方刊物拍攝封面照，至凌晨12時許，即與一班默默在電視城門外等候的數十名粉絲開迷你慶功宴。粉絲分別拉上「視帝耀祥，演技稱王，豪情一現，更顯光芒」及「出類拔萃，實至名歸，萬千星輝，九妹最威」的巨型橫額，並開香檳及拉花炮為偶像慶祝！

「拍呢啲戲種好痛苦」

有太太及囝囝撐場的祥仔心滿意足，揚言今年不加薪酬：「舊年已有相當加幅，希望今年一樣咁順利！」單身的雯女亦相當風騷，笑言要為中女打氣：「粉絲仲幫我慶祝埋入行25周年，呢個獎啟發咗我，其實中女同入咗行好耐嘅人，即使遇上低迷環境都唔緊要，繼續努力就可以！」

休息一晚，視帝視后昨日接受查小欣訪問，雯女坦言從無擔心祥仔會失落視帝，問到可有機會3連霸？她說：「拍呢啲戲種好痛苦，反而可以考慮合作演喜劇！我哋唔係成日溝通，但同祥仔奇怪地好有默契！」祥仔則坦言不敢奢望，認為難度很高。另外，他在網上慨嘆想過退休，因為《巾》劇系列的每個角色都是死去活來的歷練，令他身心疲累：「想法歸想法，行動歸行動，自知身如柳絮隨風擺，戲子終是情歸舞台，更何況有那麼一班有質素的祥友守候身旁，亦有一班渴望看到有質素的演出的觀眾朋友和街坊們，要放棄又談何容易呢？」

廣州吸1,710萬劇迷

另外，《義》劇雖已曲終人散，但熱潮仍未減退，無綫昨日公布廣州地區的收視成績，《義》劇的大結局吸引1,710萬人收看，排第2位的廣州電視台珠江頻度的節目僅得157萬人收看，拋離對手十倍有多，榮登全廣州收視冠軍！雯女昨日在電話中興奮表示勁開心，更直言是意料中事：「故事喺廣州發生，九姑娘特別『巴拉沙』（好犀利），佢哋冇理由唔撐！」對於換獎傳聞，雯女沒好氣說：「話陳生（陳志雲）回巢幫我攞獎，講到陳先隻手遮天咁，對我亦好唔公平！」祥仔昨日特別休假1日陪家人，更專誠接兒子放學：「換獎傳聞完全唔合邏輯！收視好就值得慶祝，呢啲係用錢買唔到嘅快樂！」