Fundman睇市：華潤電力估值翻身在望

美股隔晚升超過2%收市，港股尋日裂口高開超過300點，但十二月效應下，基金於高位接貨的興趣唔大，恒指浸浸落，收市升得198點，報23,448點。睇番美匯指數由81水平樓上跌番落嚟，美電卻係不跌反升，衝穿7.77水平，去到九月初以來最高水平，反映熱錢並無明顯流入迹象。另一邊廂，昨日市場傳中央經濟工作會議可能押後召開，傳統上，因避險需要，內地基金通常在會議前夕從股市抽資，如果議期押後，擔心A股十二月上旬會相當淡靜。

近期人行大員在各大吹風活動中頻頻有嘢講，前日人行副行長杜金富表示，央行將引導貨幣信貸總額趨向常態，係咪意味着「適度寬鬆」已經玩完？由早前傳的上調通脹目標到近日的「信貸回歸常態」所見，可能性都幾高。一月初銀行再放水之前，看來股市都幾難捱，滬綜指要重返3,000點關口樓上，有點難度，恐怕直接影響到港股表現。

內地傳媒引述，發改委要求內地煤炭企業保障供應，穩定煤價，市場解讀為來年合約煤價，將要配合冷卻通脹穩定物價的大方向，可能上調無望。原本大行估一一年煤價最少有10至15%升幅，今次一盆冷水潑落嚟，幾隻煤股即時散晒，神華（01088）跌5.1%，中煤（01898）跌4.4%，兗煤（01171）跌3.1%。

電力股走勢大落後

無形之手干預自然有辣有唔辣，邊類公司有着數，睇尋日市場反應經已一清二楚，尤其電力股今年大落後，年初至今恒指升咗7.2%，大唐發電（00991）仲跌緊10.7%，華潤電力（00836）跌6.6%，最叻的華能（00902）亦只係升0.6%咁大把，一旦市場把煤價升幅預期由10至15%降到0至3%，電力股業績短期有被重估的必要，相信可以支持升勢一段時間。

以華潤電力為例，九月中港股開始的升浪，完全無佢份不特止，仲由17.5元附近，直插到上星期低位12.88元至企定，一來反映投資者對煤價向上的共識，其次係國家要控制通脹，加電價訴求勢必被壓抑，整個電力行業隨時返去○八年「一路發電一路蝕」的日子，但若然煤價不升，情況當然就完全唔同。

市帳率處歷史低位

煤企受煤價影響，史提芬相信以市帳率去衡量抵買與否，可能更加合適，睇番○六年中至今，潤電的市帳率都幾極端，高位是○七年炒港股直通車時期的6.6倍，一年之後，○八年就因煤價狂升，內地電力行業錄得虧損（相對營運表現較佳的潤電，純利亦跌四成六去到17.2億），潤電市帳率跌到1.7倍。反觀今日，即使股價從低位反彈一成二，以中期報告計算出的每股資產淨值8.27元，市帳率講緊都不過是1.74倍。可是，比較今、明兩年潤電的預測盈利能力，以及煤價平穩發展的可能，估值是有進一步被調升的空間。

綜合大行預期，中期已賺24.6億的潤電，全年業績54.75億，預期市盈率約12.3倍，比恒指成分股平均低8%左右，亦比潤電歷史估值的16.7倍低兩成六，睇嚟短期內股價重返16至17元，問題應該唔大。