吸金王嘉欣每分鐘賺＄6,666

聖誕及除夕將至，又到藝人吸金好時機！準媽咪李嘉欣的商場亮相價高達40萬元，傲視群星，榮膺吸金女王！「萬人迷」吳尊的亮相價亦令人咋舌，不包食宿穩袋30至40萬元，而性感女神鍾楚紅則企穩25萬元亮相價！

踏入12月，聖誕及除夕逼埋身，除了是市民普天同慶的日子，更是圈中人的搵銀黃金檔期！不少商場除了鬥布置裝飾外，更不吝嗇大開水喉廣邀藝人到商場造勢。經過1年時間，今年藝人、名人及模特兒的商場亮相價重新洗牌，當中以李嘉欣的吸金力最為強勁！

懷孕帶挈身價

原本騷價已達頂級的嘉欣，懷孕後身價更是水漲船高，單是出席普通商場活動，便可輕鬆穩袋40萬元！以出騷平均1小時計，1分鐘便可賺約6,666元，認真和味！若客戶有其他特別要求，亮相價更是倍增！不過，嘉欣最近指母親嫌她工作太多，並下令不准她與老公許晉亨外遊，嘉欣為保胎兒健康，隨時會專心養胎，謝絕工作，更會令身價飆升！

本地薑有嘉欣獨佔鰲頭，過江龍則是台灣組合飛輪海成員吳尊稱霸！據知不包機票食宿，吳尊單人來港的亮相價高達30至40萬元！正所謂物以罕為貴，鮮有出席商場活動的鍾楚紅（紅姑），亮相價亦企穩25萬元！相反向來是商場活動寵兒的樂基兒，今年走勢繼續強勁，去年仍拎13萬元亮相價的她，今年飆升逾50%，升到15至20萬，「天王嫂」之名果然不賴！

林欣彤狂升75%

公仔箱方面，一眾藝員的騷價更是有價有市，《公主嫁到》雙星佘詩曼及陳法拉，酬勞分別高達9萬元及6萬元，難怪法拉接受電話訪問時興奮地說：「好開心有咁多活動搵我，今年成績咁好，都係多得幾套劇帶挈！依家因為拍電影，所以時間多咗，可以有多啲時間搵真錢！」至於「超級巨聲2」冠軍林欣彤（Mag），自參選後商場亮相價已達兩萬，而聖誕檔期更增至35,000元，升幅達75%！有傳奧海城將邀請Mag任除夕倒數嘉賓，當被問到是否抵用？信和集團商場推廣總經理蘇蔡潔蓮說：「咁請得梗係抵，鍾意先會請o架嘛！」