娛圈大蠔客
收到風話，娛樂圈有班大「蠔」客，唔係話佢哋有幾多億身家，亦唔係講緊燒銀紙，而係鍾意食蠔。梗係啦，生蠔千嬌百「味」：爽身、Creamy、海水味重、鮮甜，款款不同，輕易就顛倒眾「星」，聽講佢哋經常去餐廳Oyster Express「蠔」氣開餐，一打打食都面不改容。
今時今日，想食靚蠔非常容易，皆因坊間有不少「蠔吧」，唔需要再喺Buffet枱同人搶；多年前，由靚女Winnie Leung開設的Oyster Express，就係早期的蠔吧之一，當年的跑馬地店，到現時的尖沙咀店、旺角店，都有大把明星「蠔」客捧場。
影帝紅酒襯蠔
顧名思義，這是間食蠔的專門店，但打開餐牌看，一樣有供應其他海鮮、主菜、頭盤及甜品等，歷來幫襯過的明星可謂多不勝數，包括梁朝偉、劉嘉玲、鄭秀文、林峯、許志安、黃家強、謝安琪、林曉峰、康子妮、周秀娜、佘詩曼及梅小惠等。
眾星中，「電眼」影帝梁朝偉就係資深「蠔」客。據說他非常隨和，每次都交由老闆Winnie發辦，最愛質感Creamy的生蠔，還獨特的配以紅酒品嘗，其他心水就是焗蠔、龍蝦仔刺身、海膽意粉及海鮮湯等，仲試過跟劉嘉玲、老友吳廷燁前來開餐。至於歌影視三棲發展的林峯亦係餐廳熟客，每次都是百忙中偷閒來淺嘗，最愛法國蠔Fine de Claire。
一打打「蠔」住食
餐廳每日供應約二十多款蠔，分別來自美國、澳洲、南非及法國等，全部經專人揀貨，唔靚唔上架。據說眾星通常會一打打的柯打來食，盡情「蠔」一餐。唔單止堂食，甚至有明星選擇外賣，回家慢慢歎。
生蠔以外，餐廳亦有其他招牌菜，像一道新西蘭深海龍蝦仔刺身，爽口鮮甜，最得容祖兒歡心；香味四溢的北海道海膽意粉，大大瓣海膽鋪面，難怪影帝都愛食；至於壓軸的甜品有極濃北海道牛乳布甸，軟滑香濃，粉絲食客就有視后佘詩曼、周秀娜，唔怪之得佢哋咁靚女啦。
查詢：2375 6778
生蠔 每隻$32起
（由檸檬順時針計起）Kumamoto、Westcott Pacific、Namibia、Bretonne、Irish Premium及Fine de Claire，全都是今期揀手貨，由淺味嘗起到濃味，配襯白酒最Perfect！
Gillardeau $78/隻
這款法國極品生蠔今期當造，鮮甜爽口、海水味濃，食完更有悠長After Taste，餐廳還供應少見的No.2尺碼，大大隻食得夠豪！
秘製海膽龍蝦湯 $98
用上原隻波士頓龍蝦，每隻只可做兩碗湯，龍蝦殼連同蔬菜熬製，倒湯時還會在碗內先放一瓣海膽，令海膽釋放香味。捧場客有許志安、關芝琳。
生蠔、海鮮每天新鮮運到，全部陳列在凍櫃之內，不妨看看是日揀手靚貨。
店子不大但Cozy，唔怕人多嘈吵，可靜靜的開餐。
Fine de Claire正啲！（設計對白）
新西蘭深海龍蝦仔刺身 $138/隻、$198/2隻
這款得梁朝偉、容祖兒及黃家強力撐的菜式，肉質結實、蝦味鮮甜，蘸點日本芥末及豉油最好食。
北海道海膽意粉 $168
大大瓣海膽鮮甜濃郁；而經蒜蓉、洋葱及香草炒過的意粉，口感煙韌，不妨襯杯帶果香的Riesling品嘗。
Creamy嘅啱我！（設計對白）
法國膏蟹 $238/磅
打開蟹蓋即見爆棚蟹膏，啖啖甘香軟滑，蟹肉則結實鮮甜。此蟹凍食最好味，黑椒牛油炒蟹身的滋味也不錯。
極濃北海道牛乳布甸（前）$25
朱古力甜酒牛乳布甸（後）$35
前者奶味甜香無比，入口滑嘟嘟，佘詩曼、周秀娜最愛食；後者則將甜酒混入布甸之內，層次豐富。