Fundman睇市：葉氏化工已屆吸引水平

南北韓互送炮彈，都預咗對金融市場衝擊有限，可惜港股仲係反彈無力，尋日恒指升得127點，收報23,023點，只係升番前日600多點跌幅的五分之一，港股注意力仲係集中喺負面消息身上。近期幾間內地銀行陸續交出營運數字，精明的大行計一計，認為主要內銀差不多已將全年貸款額度用完，年底前的一段時間，要同幾間內銀要錢唔容易，配合中央流動性管理的主題，預期人行會將明年新增貸款目標由今年的7.5萬億元人民幣，下調到6萬億至7萬億元人民幣，莫財底下，中字派要大升並唔容易。

內地新股炒得夠癲

港股氣氛唔好，新股好自然首當其衝，近期幾隻半新股有愈潛愈深情況，除雅士利（01230）同環球乳業（01007）之外，早兩日掛牌，保薦行對「綠鞋」出盡法寶都撐唔住嘅熔盛重工（01101），通通貼住上市低位。據聞部分排住隊十二月上市的公司，正打算打退堂鼓。

相比之下，A股確係一個奇怪市場，筆者留意到前日內地盤後消息，先知道周二滬綜指狂插至多3%，掛牌嘅四分之三股票見紅，但內地股民當日卻反而湧晒去炒新股，有3隻新股，1隻叫浩陵榨菜嘅，收市比招股價升1.91倍，天廣消防升1.01倍，最後1隻叫老板電器都要升六成三，到底係內地上市企業真係「錢途」無限？抑或內地股民炒得瘋狂？大家心知肚明，只係礙於無一張中國身份證，無法齊齊玩吓這類抽獎遊戲！

化工股龍頭葉氏化工（00408）前日出中期成績表，純利跌咗兩成五，去到1.71億元，股價從9.14元插到7.95元後，尋日開始穩定落嚟，反彈番0.27元，報8.22元收市。

葉氏核心業務分三部分，包括溶劑、塗料及潤滑油，前兩者屬主打項目，分別佔總銷售額60%及35%，業績倒退，管理層解釋是原材料價格上半年度出現異常波動所致，不單止去年毛利短暫擴闊的優勢消失，溶劑主要生產原材料丁醇價格期間突然急挫，亦令存貨虧損。

葉氏業務其實頗簡單，溶劑生意主要買來材料進行加工，賺取約兩成毛利轉售，原材料價格的高低，百分百轉嫁買家，除非波動得太離譜，否則幾乎是穩賺不賠的生意；至於塗料，葉氏正大力推廣旗下「紫荊花」品牌，希望由主打上游的發展商、工程承建商，走到毛利更高的下游民用市場，並由華南基地擴展到華東一帶，成為未來增長的重點。

業績倒退非戰之罪

管理層把業績倒退歸咎於原材料價格的不尋常波動，強調九月已回復正常。睇番往績，○六至○九年葉氏毛利率介乎18.51%至20.25%，是頗為穩定，比較特別是金融海嘯後半年，即○九年三至九月，去到25%（和當時內地工業生產谷底回升，急單大增有關），今次中期業績跌至16%，一如公司所指，是並不常見。

經過幾年擴大市場份額，購併提升產能，葉氏半年銷售額36.5億元，經已等於○六年全年嘅1.1倍，估計今年唔難交出70億元的銷售額，公司目標是三至四年內提前達到100億元的目標，明年至少可見77億元，以20%毛利假設，即15.4億元，純利率5至6%的話，合理推測可賺3.85億至4.62億元。

以目前45.3億元的市值計，葉氏化工市盈率介乎9.8至11.7倍，加上4.4厘以上的股息回報，只要毛利恢復，目前估值已見吸引，如跌可以去番九月的起步位，會係更理想的入市機會。