「DaDa Idea多到漏」寸娜姐冇諗頭

「性感女神」周秀娜與「百果園咪神」陳靜（DaDa），昨日隔空交「峰」。繼寫真戰較量過後，DaDa全「曆」催谷噴血年曆，反觀娜姐則自言欠諗頭而避戰，DaDa聞言禁不住寸爆說：「吓？佢冇Idea咩？」

升呢為性感女神的周秀娜（Chrissie），近年工作不絕，憑32D的Big爆身材狂接性感內衣或泳衣騷，豬籠入水，每次行內衣騷，均能吸引大批傳媒及龍友喪影，但昨日她與星級化妝師Rick Chin出席《Excited？In Seductive Glory》記者會時，卻反常態惜肉如金！

昨日娜姐袋六位數酬勞與外籍女模同場行騷，壓軸出場的她雖穿Bra Top狂騷「事業線」，身材遠勝同場女模，但卻穿上黑色長褲掩蓋美腿，大煞風景，行騷只短短3分鐘便火速返後台，換上背心再見人，相當「Bra閉」，有別以往性感到底的態度。

不問酬勞想進步

對於只「露上不露下」？娜姐解釋：「我帶咗短褲，但同個Bra唔襯，所以着長褲。（唔着成套內衣？）一早講咗唔係着成套，唔緊要啦！主要係介紹個Bra。（效果唔靚？）係咩？下次將長褲剪短。」她又否認是要於其他女模中「凸出」自己。問到是否要高價才請得郁行內衣騷？娜姐說：「價錢係公司傾，自己唔知，總之酬勞滿意。（冇理由唔知？）人需要有進步，希望自己有進步空間！」

本年中，娜姐與DaDa的寫真戰鬥得難分難解，寫真大戰後，DaDa繼續狂谷性感年曆，反而娜姐未有動靜，她說：「本來諗住出，但個期唔啱，而且上年已經做過，未諗到新Idea，所以唔出。（如果再出會更性感？）唔會只係性感，希望帶出訊息。」由於另一死敵Angelababy，與熊黛林亦推出年曆，問到會否擔心風頭被搶？娜姐說：「冇比較，我滿意上年嗰本，與其突破唔到，寧願唔出。」

諗定出年新構思

另一邊廂，當DaDa得悉娜姐因欠諗頭而留「曆」後，她昨日在電話中禁不住暗寸：「吓？佢冇Idea？我有喎！仲諗到52個星期嘅Idea，依家仲已經着手諗下年嘅Idea添，驚冇得出嘛！不過我都想佢一齊出，百花齊放，多啲嘢睇仲好。」

乜都鬥一番

o靚模界競爭激烈，除了鬥性感外，Chrissie與DaDa在不同範疇均鬥得難分難解。

鬥粉絲

圈中藝人熱玩微博，Chrissie與DaDa經常在微博更新近況，前者坐擁46萬博友粉絲，DaDa亦有12萬人支持。

鬥工作

Chrissie今年接拍四部電影大多擔正，包括《抱抱俏佳人》及聖誕檔的《婚前試愛》。而DaDa接拍電影《宅男總動員》及兩部賀歲片《最強囍事》、《我愛香港》。

鬥買樓

Chrissie已儲夠1千萬元樓盤的首期，並睇中中環、上環等地區的800呎單位。DaDa則睇中西九龍區400萬元樓盤，更自爆已付三成首期做業主。

周秀娜（25歲）

三圍：32D、24、35

身高：167cm

陳靜（21歲）

三圍：33D、24、34

身高：167cm