祖兒無奈讓獎唔識愁

樂壇天后容祖兒本來是四台聯頒「傳媒大獎」大熱，卻因大會突然宣布暫停一年而好夢成空，昨晚她現身活動時顯得非常無奈，更慨嘆說：「唉！我唔識睇，冇唔開心亦冇感覺！」

容祖兒昨晚與師妹鍾欣桐（阿嬌）等出席江門市星光公園開幕騷，對於「四台聯頒音樂大獎」今年暫停，所屬的英皇娛樂隨即發聲明，永久退出以示抗議，身為「四台聯頒」獎項大熱的祖兒非常無奈，記者問她點睇，她說：「唉！我唔識睇，呢排冇時間睇新聞，冇唔開心，亦冇感覺。（公司有冇同你商量？你最受影響喎！）唔好咁講，個個都受影響，獎項係媒體對歌手嘅鼓勵，每個人心目中都有自己想畀獎嘅歌手，我做好本分就得，我冇去理解呢件事。」

謝安琪呻被動

至於阿嬌亦支持公司決定：「剛才我先知公司發咗聲明，我會支持公司決定。（祖兒冇獎好蝕底？）祖兒嘅努力大家有目共睹，希望大家多啲留意工作，獎項唔係一切。」

至於「四大」旗下的謝安琪，談及「四台聯頒」停辦一事表示「冇得揀」，她說：「做歌手冇得話想點就點，獎項由傳媒去頒，歌手好被動，只有努力去做！」有指取消聯頒對其唱片公司環球較公平，她說：「唔可以獨立咁睇，我個人冇乜特別感受，獎係人哋頒畀我，會視為鼓勵！」對於英皇及東亞封殺「四台聯頒」，她認為是個別公司的決定，不便評論。

而屬東亞旗下的楊千嬅表示，會尊重公司決定：「每個機構都有制度，歌手只係盡自己責任就得！」問到會否覺得樂壇變質，她說：「無論形式同制度是否改變，我都會支持。我參加咗咁多年頒獎禮，依家攞獎都唔會好似以前咁劇烈，我抱嘅係支持心態！（去晒4個頒獎禮？）盡力啦！不過我唔敢應承。」