陳家珮參觀海洋公園站，車站裝修富有海洋色彩。（受訪者提供）
雖然港鐵南港島線因利東站同金鐘總站遇到地質問題而要延期落成，但其他車站進度唔錯，南區區議會日前仲獲港鐵邀請率先參觀海洋公園站添！有份參觀嘅南區區議員Judy陳家珮不滿南港島線「歎慢板」，冇畀已經落成嘅車站率先通車，但談到婚後造人大計，Judy笑言唔使等埋區議會選舉，已經「開快車」全速努力中。
Judy透露，婚後老公搬咗入海怡半島同佢築愛巢，仲火速幫佢改埋選民登記地址；假如Judy爭取連任，區選又多一個支持者喇！雖然Judy早年長居美國，但鬼妹仔性格唔影響佢相信傳統中醫多過西醫，所以婚後一面開始以中醫調理身體，一面努力造人，目標係三年抱兩、生完仔再生女，兩個就夠晒數，思想都幾中式喎！
不過，南港島線同生BB一樣，唔係話有就有，Judy視察完海洋公園站後指，除咗遲遲未通車，仲發覺站內提供七十一個泊車位畀乘客泊車轉乘，質疑實際用途係開放畀海洋公園遊客，定係畀駕車乘客轉車呢？港鐵方面都未有答案。
第一手消息請下載on.cc東網
