莫乃光最終都同意喺創新及科技諮詢委員會運作一段時間之後，先邀請楊偉雄到立會解釋。
早幾日講過，分屬泛民嘅資訊科技界議員莫乃光一面質疑新任行政會議成員、特首創新及科技顧問、以及經改組後嘅創新及科技諮詢委員會主席楊偉雄嘅代表性，又去信邀請佢去立法會解釋對創新及科技局願景。話說立法會資訊科技及通訊事務委員會尋日就召開會議傾呢件事，一班建制派唔知係咪對創新及科技局畀泛民拉倒心中有氣，幾個發言都唔支持莫乃光嘅建議，搞到佢最後都要讓步。
其中建制派議員蔣麗芸認為，立法會過往未有邀請改組前嘅委員會主席嚟解畫，質疑楊偉雄應該用乜身份嚟立法會。旅遊界議員姚思榮則舉例指出，西九文化區都有唔少冇實權嘅諮詢委員會，認為若邀請沒權責嘅主席到立法會，加上對方剛上任，就算到立會都係嘥大家時間。
白鴿黨單仲偕則幫莫乃光「護航」，話過往曾經有邀請諮詢委員會主席嘅先例，並非破天荒。莫乃光最終都同意，先畀委員會運作一段時間，之後先邀請楊偉雄到立會解釋。
第一手消息請下載on.cc東網
