政壇：劉江華變奇難雜症專家

無話兒變有話兒

政務司司長林鄭月娥、政制及內地事務局正副局長譚志源同劉江華出席八大商會政改論壇，正當大家以為劉江華又再次「無話兒」時，撞正今次台下唔少提問都好奇怪又創新，其中愛港之聲高達斌話依家學生唔懂禮節，直言香港八間大學校長唔好再同情學生，直情應該鬧醒佢哋先啱。

有人就建議政府再次成立臨時立法會，等政改可以順利通過，更有人聲稱係國民黨支持者，話台灣選出馬英九都無乜用，證明香港跟台灣嗰套注定無運行。

足球比喻贏掌聲

面對以上發表意見多過提問嘅情況，當林鄭同譚志源你眼望我眼，你推我讓幾秒後，譚志源就將個波交畀劉江華，而唔使再「齋坐」嘅劉江華亦即時運用多年議會功力，逐一回答台下提問，最後仲要玩埋比喻，話現時就好似一場球賽，前鋒扭到入小禁區，射得入就全場鼓掌，射唔入就一定被噓，希望泛民主派諗清楚至投票。

劉江華呢個比喻贏得全場掌聲，佢亦展示滿足嘅哨牙笑容，似乎對自己解窘嘅功力同表現相當滿意。