史顏景蓮（左二）將接掌仁愛堂，獲丈夫史立德（右二）、兒子史昊洺（左一）同女兒史佩加（右一）全力支持。
仁愛堂日前舉行今屆董事局最後一個大型晚宴「周年慈善餐舞會」，主席吳明珍話除當日晚宴外，今屆尚餘下月嘅賽馬日盃賽及粵曲籌款活動，有賴一班善長支持，籌款順利達標。將於四月起「升呢」接掌新一屆仁愛堂嘅副主席史顏景蓮，就獲家人全力支持。
陳岳鵬（左）早前認番小學同學蘇慧兒。
李樂詩（左）叫何君堯幫佢屋企髹漆。
當晚出席嘉賓眾多，各董事局成員同嘉賓均配合主題穿上時尚嘅中國服飾亮相，其中史顏景蓮打扮新派又帶點古典美。佢話因為老公史立德卸任仁愛堂主席，所以說服佢加入成為仁愛堂一分子。問到子女會否效法佢，齊齊投身仁愛堂，兒子史昊洺同女兒史佩加就開聲力撐，話如果媽咪未來做主席，一定會全力支持，亦唔排除有機會加入。
陳岳鵬相認小學同學
同場仲有身穿長裙嘅副主席羅台秦、總理何歐陽翠華、張嘉齊、政制及內地事務局政助Ronald陳岳鵬等。見Ronald同一位女士好啱傾，原來係佢近年喺街上偶然相認番嘅小學同學、滙盈集團財務總監兼執行董事蘇慧兒，估唔到對方竟然仲認得佢，皆因不時喺電視或報章等媒體上見到Ronald出現，所以好易認喎。
仁愛堂前主席Junius何君堯亦有在場，佢講起近期同啲義工幫長者家居髹漆翻新天花板，以改善基層長者因為惡劣居住環境引致嘅氣管健康問題。身旁嘅極地博物館基金創辦人李樂詩聽到便即講笑話，自己都係老人家，希望Junius幫佢髹埋一份，下次先肯帶埋佢去極地探險，非常搞笑。
第一手消息請下載on.cc東網
