許鎮德話佔領行動後，行山都有人認得佢。
歷時七十九日嘅佔領行動喺聖誕節前完結，但「四點鐘許Sir」效應依然強勁。警察公共關係科總警司「許Sir」許鎮德尋日同傳媒舉行聯歡會時話，依家行出街，有市民認得佢兼打招呼，佢都點吓頭微笑，期間亦發生唔少趣事。
話說有個周日許Sir同太太去大澳行山，行行吓，有個市民突然間行埋佢度話：「你好面善！」許Sir於是點吓頭笑吓，轉個背，嗰位市民就同身邊嘅朋友講：「嗱！我都話呢個係許Sir o架啦，佢化咗灰，我都認得。」令許Sir啼笑皆非，心諗：「如果我真係化咗灰，仲認唔認得我先？」
許Sir風頭真係堪稱「警隊發哥」（周潤發），皆因佢行行吓街，就有市民向佢集郵影相同攞簽名，但鬧佢嘅人就好少，可能市民見佢成日笑笑口，就算有怒氣都消咗一半。佢尋日派咗隻少年警訊四十周年usb資料儲存「手指」畀大家，裏面儲存咗七段短片，包括警花分享處理佔領行動嘅感受，提升吓警隊形象，認真識運用資源。
第一手消息請下載on.cc東網
