設計圖片及對白
本港樓市可謂高處未算高，政府採取雙辣招打擊炒樓都冇乜用，勞工及福利局政助黎穎瑜（Jade）及民政事務局政助徐英偉（Caspar）早前更不約而同入市，前者喺九龍城買咗住宅單位，後者就由太太出手買咗個深水埗住宅單位。翻查各政治助理最近嘅利益申報表，本身喺加拿大同美國都有物業出租同自用嘅Caspar，去年十二月一日就向政府申報，決定只保留加拿大物業，已將美國拉斯維加斯嘅「分時渡假物業」出售。
阿Jade唔驚雙辣招
十一月底，佢更申報太太入咗貨，喺深水埗買咗層樓，主要畀其他家庭成員自住。其實Caspar同太太之前曾聯名買咗一層深水埗物業，但佢太太就喺十月將自己擁有嗰一半業權過埋畀Caspar，所以今次置業，就唔使繳交雙倍印花稅，Caspar話，今次佢太太都唔係買新樓，亦唔係市建局嘅新樓，只係同區普通舊樓啫。
至於勞福局政助阿Jade就喺上月嘅平安夜當日，向政府申報買咗個九龍城區一個物業，今次係佢首次喺香港置業，完全唔驚受雙辣招影響。
其實，Jade早喺廣州擁有一個商業單位收租，又喺倫敦有一個住宅物業收租，加埋佢老公喺東京有個住宅物業放租，兩公婆單係收租都相當和味。
話時話，每名政治助理月薪平均接近十萬元，買樓真係冇難度啫。
第一手消息請下載on.cc東網
