設計圖片及對白
政黨每年開支數以幾百萬元計，除咗搵金主「泵水」外，好多都會透過街頭募捐或舉辦籌款晚宴撲水，望籌得款項，應付來年開支。民主黨（白鴿黨）原訂喺去年十月舉行二十周年黨慶兼籌款晚宴，因佔領行動而押後至今年二月，仲將下月籌款目標，由最初嘅六百萬元大幅調低至三百萬元，目標大縮水之外，該黨兩名新任副主席尹兆堅及羅健熙尋日講起今年籌款情況時，更流露看淡、唔樂觀嘅一面，唔通白鴿已知搶錢無望？
今年係白鴿黨創黨二十周年，該黨主席劉慧卿一早豪言想「搞大佢」，仲定出六百萬元籌款目標，希望高過去年籌到嘅二百三十五萬元嘅一倍。不過，籌款委員會主席李華明上月突然改口，話已經將籌款目標調低至三百萬元，足足少咗一半。羅健熙尋日被問到對今年籌款晚宴嘅情況樂唔樂觀時就話「正常囉，同之前講過嘅差唔多啦」，又話該黨一向都好努力籌款，例如賣下獎券咁。
大環境唔旺財
至於選舉經費方面，尹兆堅話根據過往經驗，區議會選舉估計每個候選人要花大約四萬元，過往該黨一向冇資助候選人，但如果候選人有經濟困難，該黨都願意借錢，之後再畀佢哋分期還款。
雖然佢哋有補貼黨員嘅開支，但白鴿近排好多律師使費，而且籌款大環境真係麻麻，譬如上星期，社民連舉辦成立八周年酒會兼晚宴，雖然筵開六十幾圍，又即場拍賣大量物品籌款，即使有籌款靈魂人物「長毛」梁國雄在場，但據聞最終只係籌到十八萬五千元，絕對談不上旺財。所以，白鴿黨籌款前景點？大家都可以估個八九不離十。
第一手消息請下載on.cc東網
