設計圖片及對白
財政預算案將於二月底揭盅，大家關注今年究竟係「加甜」定「減甜」時，有份參與新一份預算案嘅財經事務及庫務局局長陳家強，就疑似提早為預算案吹定淡風，又話本港經濟低增長或成新常態，至於政治爭拗就會窒礙長期發展，傻強呢副風中瑟縮樣，好似暗示市民勒定褲頭帶咁，唔通今年派糖都凍過水﹖
料低增長成常態
財爺鬍鬚曾早前漏口風話，樓市辣招「雙倍印花稅」令庫房進帳三百億元，其後又突然運用財技開設二百七十億元「房屋儲備金」，搞到市民好忐忑，傻強尋日出席電台節目時，先唱好幾乎全民就業嘅勞動市場，但就話由於香港缺人缺地發展各行各業，預測去年經濟增長只有百分之二左右，佢仲提醒市民，低經濟增長可能會成為香港未來發展新常態添。
近期「後佔領時期」嘅經濟後遺症開始浮現，陳家強於電台意有所指，形容政治爭拗唔會影響短期經濟，反而係窒礙長期發展，佢大吹淡風，外界難免又要展開估結餘遊戲，唉，想政府派粒糖都咁難嘅？
第一手消息請下載on.cc東網
