鬍鬚曾後生時喺美國生活，鍾意中國功夫嘅佢不時演身手。（黑白資料圖片）
農曆新年當然唔少得舞龍舞獅，財爺鬍鬚曾尋日大講舞獅嘅傳統。七十年代佢喺美國讀書同做嘢，醉心中國武術嘅佢識打洪拳，當年曾跟住「中國拳擊功夫學院」師兄弟去波士頓唐人街，表演舞獅同功夫「賣武」。不過，舞獅都唔係咁容易，佢直言，成日會面對其他人整蠱，可以話係「台上一分鐘、台下十年功」！
鬍鬚曾話，佢哋由早上開始攞住旗幟、兵器，浩浩蕩蕩逐家逐戶「巡迴演出」，因為一日收到嘅利是，已經可以幫補醒獅隊一年添置同更換器材嘅開支。佢仲話，每年農曆新年嘅周末，唐人街商舖食肆老闆都會喺門前掛上一棵生菜同利是，吸引醒獅隊拜年表演採青。不過一、二月嘅波士頓溫度接近零度，有時仲會落雪，有熟嘅朋友就會刻意整蠱，將生菜雪硬成「冰生菜」，令採青嗰時撕唔開。不過鬍鬚曾有「張良計」，就係將生菜大力撞向路肩，令冰生菜變成幾大塊，再趁「噴菜葉」時，將一塊塊嘅硬生菜，大力掟向整蠱佢嘅朋友「回敬」。另外，又有年輕人趁表演時，將炮仗掟向獅子，搞到佢哋褲腳被炸出一個個窿。
第一手消息請下載on.cc東網
