設計圖片及對白
大年初三赤口不宜拜年，工聯會立法會議員陳婉嫻（嫻姐）尋日就聯同工聯會一眾成員去黃大仙廟許願，祈求新一年幫全港打工仔爭取更多權益。不過，呢場大龍鳳卻出咗醜，正當嫻姐攞住張「訂立標準工時」嘅大吉揮春要許願時，有人就發現呢個揮春寫錯字，將「標準工時」入面嘅「準」字寫錯做「准」字，即係少咗一點之餘，仲少咗下面個「十」字。今次真係赤口搞出個大頭佛囉，究竟工聯會寫錯字甩轆，係咪有求必應嘅黃大仙想暗示畀嫻姐知，標準工時立法「十畫都未有一撇」呢？
嫻姐攞住張揮春準備許願，似乎冇發現錯字。
促港人齊心克服困境
新一屆立法會中，嫻姐經常代表勞工界喺立法會內同一眾勞福局官員舌戰，喺勞工權益上企得好硬，早前有消息指特首梁振英（CY）本來喺施政報告中提及會逐步取消強積金對沖機制，但及後因為商界反對而作罷。嫻姐隨即喺答問大會上大動肝火，質問CY係咪已經唔記得咗三百幾萬打工仔權益，又問佢幾時先會做。CY當時嘅答案係「我無提唔等如唔做」，令工聯會仍然心存希望，覺得政府遲早都會處理呢個燙手山芋。
工聯會由舊年起就力爭標準工時，藉呢瓣同對手工會爭長短，但「標準」變「標准」，都真係好離譜，最驚學生同打工仔以為錯字係正字。講番尋日嘅活動，嫻姐話，新一年希望僱主同打工仔可以「有傾有講」，盡快落實全民退休保障、標準工時立法，同埋取消強積金對沖機制，等打工仔女退休時有多啲錢喺手。至於鄉議局主席劉皇發前日向車公為香港來年運程求得一支中籤，籤文中有一句話「禍不空生自有招」，嫻姐就拒評「禍」係咪指「佔領中環」行動，淨係話如果香港人齊心，積極面對困境，好多難關都可以迎刃而解喎。
第一手消息請下載on.cc東網
