食物及衞生局局長高永文呢個農曆年真係忙個不停，首先要應付內地供港活雞驗出禽流感事件，嚟緊又要應付流感高峰期、病人逼爆公立醫院急症室問題，不過尋日佢仍然喺百忙中抽空，出席苗圃行動舉辦嘅「行路上廣州」起步禮，為百多位健兒打打氣，期間同外號「祥毛叔」嘅高齡參加者敍舊，祥毛叔仲自爆高醫生係佢嘅救命恩人！
高醫生係苗圃行動嘅中堅分子，為咗做善事身體力行，行路返內地不下十次，但今次佢就因為公務過於繁忙，抽唔到身跟隨大隊扶貧送暖，但亦都專程到場幫大家打氣同見吓班老朋友，其中一位就係現年八十七歲嘅祥毛叔。
祥毛叔透露，佢哋兩個早喺十年前嘅苗圃行動中認識，之後祥毛叔唔小心跌親腰骨，壓住咗尾龍骨神經線，差啲搞到全身癱瘓，幸得高醫生幫佢診斷醫治，佢依家先至行得走得，仲中氣十足添。不過高醫生都苦口婆心咁勸告祥毛叔，話佢年紀有番咁上下，要量力而為，唔好行太耐喇！
第一手消息請下載on.cc東網
