政壇：搞搞政：唔識喬寶寶李慧琼播帶

話說喺尋日區議會（第二）功能界別區議會議席論壇，有一個「假如我是……」嘅環節，畀候選人輕輕鬆鬆角色扮演，緩衝一下唇槍舌劍嘅氣氛，其中一條題目要求候選人代入印度裔演員喬寶寶，安撫一下佢個對國民教育感到好迷惘嘅囝囝，點知抽到呢條題目嘅建仔Starry李慧琼竟然唔知喬寶寶係邊個。

不過，講到國民教育，Starry唔使理喬寶寶係邊個啦，只要輕輕撳個play掣，就即刻七情上面滔滔不絕苦口婆心咁話：「仔呀仔呀，其實香港好開放，國民教育仲有三年諮詢期……」仲話放得心肝椗喺學校一定會好信任老師喎！

論壇上又互爆對方花名。有人就爆民協KK馮檢基最新嘅花名係「民主秦始皇」。點解？因為KK霸住主席位，唔畀新人上位，又要黨友群星拱照佢選超級議席喎！搞到KK聽到即刻反擊話自己已經五年冇做主席，技窮之時仲絕地反擊嚴詞指摘對方「失實聲明」添！