政壇：謝偉俊謝偉銓唔係兄弟

因為基因嘅關係，兄弟姊妹通常都有啲似，而近日喺政界有個傳聞，話立法會九龍東候選人謝偉俊，同參選建築、測量及都市規劃界嘅謝偉銓好似樣，懷疑佢哋兩兄弟想一齊入議會。

為咗尋求事實嘅真相，我哋打電話畀謝偉俊求證，佢聽到我哋嘅提問就話謝偉銓咁靚仔，自己唔敢高攀喎。佢仲透露都識咗謝偉銓一段時間o架喇，但兩人絕對冇任何關係。不過，謝偉俊的確係有一個細佬，但已移居美國多年，並與父母同住，每隔一至兩年就會相聚一次。至於謝偉銓就話十幾年前已經有人問佢係咪謝偉俊嘅兄弟，佢都覺得幾好笑。不過，佢哋既冇親戚關係，亦冇成日見面，通常喺啲朋友聚會時至會碰頭。

九龍東嘅候選名單仲有胡志偉、黃國健、陳鑑林、梁家傑、陶君行、黃洋達、譚香文、嚴鳳至。而建築、測量及都市規劃界嘅候選人就仲有劉秀成同吳永輝。